ରାହୁଲଙ୍କ ନ୍ୟାୟ ଯାତ୍ରା ଷ୍ଟିୟରିଂ ସମ୍ଭାଳିଲେ ତେଜସ୍ବୀ ଯାଦବ

ରୋହତାସ: ବରିଷ୍ଠ କଂଗ୍ରେସ ନେତା ରାହୁଲ ଗାନ୍ଧୀଙ୍କ ‘‘ଭାରତ ଯୋଡ଼ୋ ନ୍ୟାୟ ଯାତ୍ରା’’ ରୋହତାସ(ସାସାରାମ) ପହଞ୍ଚିସାରିଛି। ଶୁକ୍ରବାର ଆରଜେଡି ସୁପ୍ରିମୋ ଲାଲୁ ପ୍ରସାଦଙ୍କ ପୁଅ ତଥା ପୂର୍ବତନ ଉପମୁଖ୍ୟମନ୍ତ୍ରୀ ତେଜସ୍ୱୀ ଯାଦବ ରୋହତାସରେ ପହଞ୍ଚିଛନ୍ତି। ତେଜସ୍ୱୀ ଯାଦବ କେବଳ ରାହୁଲ ଗାନ୍ଧୀଙ୍କ ଯାତ୍ରାରେ ସାମିଲ ହୋଇନାହାନ୍ତି ବରଂ ତାଙ୍କର ସାରଥୀ ମଧ୍ୟ ସାଜିଛନ୍ତି। ତେଜସ୍ୱୀ ଯାଦବ ରାହୁଲ ଗାନ୍ଧୀଙ୍କ ସହ ଏକ ଲାଲ ଚାରି ଚକିଆ ଯାନରେ ଇଣ୍ଡିଆ ମେଣ୍ଟର ହଜାର ହଜାର କର୍ମୀ ଏବଂ ସମର୍ଥକଙ୍କ ସହ ନଜର ଆସିଥିଲେ। କଂଗ୍ରେସର ବରିଷ୍ଠ ନେତ୍ରୀ ମୀରା କୁମାରଙ୍କୁ ମଧ୍ୟ କାରର ପଛ ସିଟରେ ଦେଖିବାକୁ ମିଳିଥିଲା।

ରାହୁଲ ଗାନ୍ଧୀଙ୍କ ନ୍ୟାୟ ଯାତ୍ରା ସମୟରେ ରୋହତାସର ଟେକାରୀରେ ବହୁ ସଂଖ୍ୟାରେ ଲୋକ କୃଷକ ଆନ୍ଦୋଳନରେ ଏକାଠି ହୋଇଥିଲେ। ରାହୁଲ ଗାନ୍ଧୀ ଏବଂ ତେଜସ୍ୱୀ ଯାଦବ କୃଷକମାନଙ୍କୁ ସମ୍ବୋଧିତ କରିଥିଲେ। ଏହି ଅବସରରେ ତେଜସ୍ୱୀ ଯାଦବ ବିହାରରେ ଚାକିରି ଦେବା କଥା ମଧ୍ୟ କହିଛନ୍ତି। ସେ କହିଛନ୍ତି ଯେ, ୧୭ ମାସର ସରକାରରେ ଚାକିରି ମଧ୍ୟ ଦିଆଯାଇଛି। ରାହୁଲ ଗାନ୍ଧୀ କହିଛନ୍ତି ଯେ, ଇଣ୍ଡିଆ ସରକାର ଆସିଲେ ଏମଏସପି ଗ୍ୟାରେଣ୍ଟି ଦିଆଯିବ।

ସୂଚନା ମୁତାବକ, ରାହୁଲ ଗାନ୍ଧୀ ଆଜି ରୋହତାସରେ କୃଷକ ନେତାଙ୍କ ସହ ଆଲୋଚନା କରିବେ। ଦିନ ପ୍ରାୟ ୨ଟା ୩୦ ସମୟରେ ତେଜସ୍ୱୀ ଯାଦବ ଏବଂ ରାହୁଲ ଗାନ୍ଧୀ କୈମୁରରେ ଏକ ସଭାକୁ ସମ୍ବୋଧିତ କରିବେ ଏବଂ ସନ୍ଧ୍ୟା ପ୍ରାୟ ୫ଟାରେ ଯାତ୍ରା ଉତ୍ତରପ୍ରଦେଶରେ ପ୍ରବେଶ କରିବ।