ବ୍ରହ୍ମପୁର: ତାମିଲନାଡୁରୁ ବ୍ରହ୍ମପୁରକୁ ଚାଲାଣ ହେଉଥିବା ବିପୁଳ ପରିମାଣର ସୁନା ଓ ରୂପା ଅଳଙ୍କାରକୁ ଜବତ କରିଛି ବ୍ରହ୍ମପୁର ଗୋସାଇଁନୂଆଗାଁ ଥାନା ପୁଲିସ। ଏହି ସୁନା ଓ ରୂପା କାରରେ ଆଣୁଥିବା ୩ ଜଣଙ୍କୁ ଅଟକ ରଖାଯାଇଥିବା ବେଳେ ସେଗୁଡ଼ିକ ଅସଲ କି ନୁହେଁ ଏବଂ ଜିଏସଟି ପଇଠ ହୋଇଛି କି ନାହିଁ ତାହାର ଖୋଳତାଡ ଆରମ୍ଭ ହୋଇଛି।
ଲୁଚାଛପାରେ କାରରେ ଆନ୍ଧ୍ରପ୍ରଦେଶ ଓ ତାମିଲନାଡୁ ଭଳି ରାଜ୍ୟରୁ ପ୍ରତ୍ୟେକ ଦିନ ବିପୁଳ ପରିମାଣରେ ସୁନା ଓ ରୂପା ଅଳଙ୍କାର ବ୍ରହ୍ମପୁରକୁ ଚାଲାଣ ହେଉଥିବା ନେଇ ବ୍ରହ୍ମପୁର ପୁଲିସ ନିକଟରେ ଖବର ରହିଥିଲା। ସେହିକ୍ରମରେ ଶନିବାର ସନ୍ଧ୍ୟାରେ ଗୋସାଇଁନୂଆଗାଁ ଥାନା ଅଧିକାରୀ ସୁମିତ ସୋରେନ ଓ ତାଙ୍କ ଟିମ ଅନ୍ଧପସରା ରୋଡରେ ଯାଞ୍ଚ ଆରମ୍ଭ କରିଥିଲେ। ଜାତୀୟ ରାପଥ ୧୬ ଦେଇ ବ୍ରହ୍ମପୁର ସହରକୁ ପ୍ରବେଶ କରୁଥିବା ତାମିଲନାଡୁର ଏକ କାର (ଟିଏନ-୯୦-ଡି-୮୧୧୬)କୁ ସନ୍ଦେହରେ ଅଟକାଇ ଯାଞ୍ଚ ବେଳେ ତା ଭିତରୁ ବିପୁଳ ପରିମାଣରେ ସୁନା ଓ ରୂପା ଅଳଙ୍କାର ଥିବା ଜଣାପଡ଼ିଥିଲା। କାରରେ ବସିଥିବା ୩ ଜଣ ବ୍ୟକ୍ତି ଅଳଙ୍କାରଗୁଡ଼ିକୁ କାରର ଡିକି ସହ ସିଟ ଭିତରେ ଲୁଚାଇ ଆଣୁଥିଲେ। ପୁଲିସ କାର ସହ ୩ ଜଣଙ୍କୁ ଥାନାକୁ ନେଇ ପଚରାଉଚରା କରିବା ପରେ ଏହି ସୁନା ସବୁ ତାମିଲନାଡୁର ସାଲେମ ଅଞ୍ଚଳରୁ ବ୍ରହ୍ମପୁରର ପ୍ରେମନଗରକୁ ଅଣାଯାଉଥିଲା ବୋଲି ସେମାନେ କହିଥିଲେ। ଅଲଗା ଅଲଗା ପ୍ୟାକେଟରେ ଭର୍ତ୍ତି ରୂପା ଅଳଙ୍କାରକୁ ଓଜନ କରାଯିବା ପରେ ତାହା ୪୦୧ କେଜି ଓ ସୁନା ଅଳଙ୍କାର ଓଜନ ପରେ ତାହା ୬.୧୭୬ କେଜି ବୋଲି ସ୍ପଷ୍ଟ ହୋଇଥିଲା। ଅନେକ ବର୍ଷ ହେବ ସେମାନେ ଏଭଳି ସୁନା ଓ ରୂପା ଅଳଙ୍କାର ଆଣି ବ୍ରହ୍ମପୁରର ବ୍ୟବସାୟୀଙ୍କୁ ଯୋଗାଇଥାନ୍ତି ବୋଲି ଥାନାରେ ଅଟକ ଥିବା ୩ଜଣ ଡି.ସନ୍ତୋଷ, ଡି. ଶ୍ରୀନିବାସ ଓ ପେଦାନ୍ନା ରମଣା ପୁଲିସକୁ କହିଥିଲେ। ଜବତ ଅଳଙ୍କାରର ଜିଏସଟି ବିଲ ମଧ୍ୟ ଦେଖାଇଥିଲେ। ସେହି ବିଲରେ କିଛି ୧୮ କ୍ୟାରେଟ ଓ କିଛି ୨୨ କ୍ୟାରେଟ ସୁନା ରହିଥିବା ଲେଖା ହୋଇଛି। ହେଲେ ଯେତିକି ଅଳଙ୍କାର ଜବତ ହୋଇଛି ତାହାର ସମ୍ପୂର୍ଣ୍ଣ ବିଲ ଅଛିକି ନାହିଁ ତାହା ସନ୍ଦେହ ଘେରରେ ଥିବାରୁ ଜିଏସଟି ଅଧିକାରୀଙ୍କୁ ଡକାଯାଇଛି ବୋଲି ବ୍ରହ୍ମପୁର ଟାଉନ ଏସଡିପିଓ ବିଷ୍ଣୁପ୍ରସାଦ ପତି କହିଛନ୍ତି। ଅଳଙ୍କାରଗୁଡ଼ିକ ଅସଲି କି ନକଲି ନେଇ ମଧ୍ୟ ସନ୍ଦେହ ଉପୁଜିଥିବାରୁ ତାହାର ଯାଞ୍ଚ କରାଯିବ ବୋଲି ଜଣାପଡ଼ିଛି।
