ବେଗୁନିଆ: ଖୋର୍ଦ୍ଧା ଜିଲା ବେଗୁନିଆ ବ୍ଲକ ଅନ୍ତର୍ଗତ ପୋଡାଡିହ ସେବା ସମବାୟ ସମିତିରେ କାର୍ଯ୍ୟରତ ସମ୍ପାଦକ ଧନେଶ୍ୱର ମାଣିକ ଜାଲ ଶିକ୍ଷାଗତ ଯୋଗ୍ୟତା ପ୍ରମାଣ ପତ୍ର ଦେଇ ସମ୍ପାଦକ ଚାକିରୀ କରିଥିବାର ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏବଂ ଜିଲାପାଳଙ୍କ ନିକଟରେ ଅଭିଯୋଗ ହୋଇଛି। ଗ୍ରାମର ପୂର୍ବତନ ସରପଞ୍ଚ ସୁଦର୍ଶନ ମାଣିକ ତାଙ୍କର ଜାଲ ପ୍ରମାଣପତ୍ର ସମ୍ପର୍କରେ ସୂଚନା ଅଧିକାର ଆଇନ ବଳରେ ତଥ୍ୟ ମାଗି ଉପଯୁକ୍ତ ପ୍ରମାଣ ସହିତ ଉଚ୍ଚ କର୍ତ୍ତୃପକ୍ଷଙ୍କ ନିକଟରେ ଅଭିଯୋଗ କରିଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରା ନଯିବାରୁ ଗ୍ରାମର ସମାଜସେବୀ ତଥା ସୂଚନା ଅଧିକାର କର୍ମୀ ବିଭୂତି ଭୂଷଣ ଦାଶ ଏ ସଂକ୍ରାନ୍ତରେ ଭୁବନେଶ୍ୱରସ୍ଥିତ ଲୋକାୟୁକ୍ତଙ୍କ ନିକଟରେ ଏଲ ୱାଇ ୩୨୪/୨୧ ନଂ ମାମଲା ରୁଜୁ କରିଛନ୍ତି । କେଶ ରୁଜୁ ହେବା ପରେ ଲୋକାୟୁକ୍ତ ଖୋର୍ଦ୍ଧା ଏଆରସିଏସଙ୍କୁ ଏହି ଘଟଣାର ତଦନ୍ତ କରି ରିପୋର୍ଟ ପ୍ରଦାନ କରିବା ପାଇଁ ନିର୍ଦେଶ ଦେଇଥିବାବେଳେ ଗତ ନଭେମ୍ବର ୨୫ ତାରିଖ ଦିନ ଏଆରସିଏସ ଲୋକାୟୁକ୍ତଙ୍କ ନିକଟରେ ରିପୋର୍ଟ ପ୍ରଦାନ କରିଛନ୍ତି ।
କୋର୍ଟର ନିର୍ଦ୍ଧାରିତ ତାରିଖ ଚଳିତ ମାସ ୧୬ରେ ଏଆରସିଏସଙ୍କ ଅନୁପସ୍ଥିତିରେ ଏସଏଆର ପ୍ରଭାଷ କୁମାର ମାଣିକ ଏବଂ ସମ୍ପାଦକଙ୍କ ପକ୍ଷରୁ ତାଙ୍କର ଓକିଲ ଯୁଗଜ୍ୟୋତି ପ୍ରହରାଜ ଉପସ୍ଥିତ ଥିଲେ। ଅଭିଯୋଗକାରୀ ଶ୍ରୀ ଦାଶ ମଧ୍ୟ ଉପସ୍ଥିତ ଥିଲେ। ଏଆରସିଏସ ଦେଇଥିବା ତଦନ୍ତ ରିପୋର୍ଟ ଏବଂ ସଂପାଦକଙ୍କ ଉତ୍ତର ଉପଯୁକ୍ତ ବିବେଚନା କରି ନିରୂପଣ ପାଇଁ ତଦନ୍ତକାରୀ ନିର୍ଦେଶକଙ୍କୁ ପ୍ରାଥମିକ ତଦନ୍ତ କରି ତିନିମାସ ମଧ୍ୟରେ ତଥା ଆସନ୍ତା ମାର୍ଚ୍ଚ ମାସ ୧୪ ତାରିଖ ସୁଦ୍ଧା ତଦନ୍ତ ରିପୋର୍ଟ ପ୍ରଦାନ କରିବା ପାଇଁ ତଦନ୍ତକାରୀ ନିର୍ଦେଶକଙ୍କୁ ଲୋକାୟୁକ୍ତ ନିର୍ଦେଶ ଦେଇଥିବାର ଜଣାପଡିଛି।
Comments are closed.