ଲଡୁଗାଁ : ଗୋଟେ ପଟେ ବନ ମହୋତ୍ସବର ମାହୋଲ। ଅନ୍ୟ ପଟେ କଳାହାଣ୍ଡି ଜିଲ୍ଲାର ଗାରିମା ବୃଦ୍ଧି କରୁଥିବା ସବୁଜ ବନାନୀ ସାହାଜଖୋଲ ଏବେ କାଠ, ମକା ମାଫିଆ ସମେତ ଜବରଦଖଲକାରୀ ମାନଙ୍କ ଯୋଗୁଁ ନଷ୍ଟ ପ୍ରାୟ । ଏପରିସ୍ଥଳେ ବନ୍ୟଜନ୍ତୁ ଭୋକିଲା ଓ ବେସହାରା ହୋଇ ଭୟଭୀତ ଅବସ୍ଥାରେ ଗାଁ ମୁହାଁ ହେଉଛନ୍ତି । ଯାହାର ଏକ ଉଦାହରଣ ହେଉଛି ଗତକାଲି ଘଟିଥିବା ଘଟଣା। ସୂଚନାନୁଯାୟୀ କୋକସରା ବ୍ଲକ ଅନ୍ତର୍ଗତ ସର୍ଗିଗୁଡ଼ା ଜଙ୍ଗଲ ନିକଟରୁ ଗତ ବିଳମ୍ବିତ ରାତିରେ ଏକ ଭାଲୁ ଖାଦ୍ୟ ଅନ୍ୱେଷଣରେ ଆସି ଗାଁ ନିକଟରେ ଥିବା ଏକ ପରିତ୍ୟକ୍ତ କୂଅରେ ପଡ଼ି ଯାଇଥିଲା। ସ୍ଥାନୀୟ ଲୋକେ ଏ ନେଇ ବେହେରା ସେକ୍ସନ ବନ ବିଭାଗକୁ ସୂଚନା ଦେଇଥିଲେ। ବନ ବିଭାଗ କର୍ମଚାରୀ ପହଞ୍ଚି ନବରଙ୍ଗପୁର ଜିଲ୍ଲାରୁ ଉଦ୍ଧାରକାରୀ ଦଳକୁ ଡକାଇ ଗତ ବିଳମ୍ବିତ ରାତିରେ କୂଅରୁ କ୍ଷତାକ୍ତ ଅବସ୍ଥାରେ ଭାଲୁକୁ ଉଦ୍ଧାର କରି ନିକଟସ୍ଥ ଜଙ୍ଗଲରେ ଛାଡି ଆସିଥିଲେ । ଉଦ୍ଧାର କାର୍ଯ୍ୟ ସମୟରେ ଧର୍ମଗଡ ବନ ବିଭାଗ ଅଧିକାରୀ, କୋକସରା ପୁଲିସ ଉପସ୍ଥିତ ଥିଲେ। ଭାଲୁ କୂଅରେ ପଡ଼ିବା ଓ ଉଦ୍ଧାର କରିବା ଯେତିକି ଜରୁରୀ, ତା ଠାରୁ ଅଧିକ ସାହାଜଖୋଲର ସଂରକ୍ଷଣ ଜରୁରୀ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି।
Comments are closed.