ପୂର୍ବତଟ ରେଳପଥରେ ପ୍ରଥମ କରୋନା ଆକ୍ରାନ୍ତଙ୍କ ମୃତ୍ୟୁ, ଆଖି ବୁଜିଲେ ଟ୍ରେନ୍ ସୁପରିଣ୍ଟେଣ୍ଡେଣ୍ଟ

ଭୁବନେଶ୍ବର: ଲକ୍‌ଡାଉନ୍‌ ହେଉ କିମ୍ବା ସଟ୍‌ଡାଉନ୍, ଜନସାଧାରଣଙ୍କୁ ନିରନ୍ତର ସେବା ଯୋଗାଇ ଆସୁଥିବା ରେଳବାଇ ଏବେ ବିପଦରେ। ପୂର୍ବତଟ ରେଳପଥର ଜଣକ ପରେ ଜଣେ କର୍ମଚାରୀ କରୋନା ସଂକ୍ରମିତ ହୋଇ ଚାଲିଥିବା ବେଳେ ଆଜି ସକାଳେ ଜଣେ ୫୨ ବର୍ଷୀୟ ଟ୍ରେନ୍ ସୁପରିଣ୍ଟେଣ୍ଡେଣ୍ଟ (ଟିଏସ୍‌)ଙ୍କର ମୃତ୍ୟୁ ହୋଇଛି। ତାଙ୍କ ନାମ ହରିହର ଲେଙ୍କା ଏବଂ ସେ କଟକ ମହାନଦୀବିହାରରେ ରହୁଥିଲେ। ଭୁବନେଶ୍ବର-ନୂଆଦିଲ୍ଲୀ ରାଜଧାନୀ ଏକ୍ସପ୍ରେସ୍‌ରେ ଶ୍ରୀ ଲେଙ୍କା ଡ୍ୟୁଟି କରି ୭ ତାରିଖରେ ଘରକୁ ଫେରିଥିଲେ। ଚାରିଦିନ ପୂର୍ବେ ସେ କରୋନା ସଂକ୍ରମିତ ଥିବା ଜଣାପଡ଼ିବା ପରେ କଟକସ୍ଥିତ ଏକ ଘରୋଇ କୋଭିଡ୍ ହସ୍ପିଟାଲରେ ଚିକିତ୍ସିତ ହେଉଥିଲେ। ଇତିମଧ୍ୟରେ ବିଭିନ୍ନ ବିଭାଗରେ କାମ କରୁଥିବା ୨୩ ଜଣ କର୍ମଚାରୀ କରୋନା ସଂକମ୍ରିତ ହେଲେଣି।

ସଂକ୍ରମିତ ରେଳ ସୁପରିଣ୍ଟେଣ୍ଡେଣ୍ଟ ଜଣକ ଅଶ୍ବିନୀ କୋଭିଡ୍‌-୧୯ ହସ୍‌ପିଟାଲରେ ଚିକିତ୍ସିତ ହେଉଥିବାବେଳେ ହୃଦ୍‌ଘାତରେ ପ୍ରାଣ ହରାଇଥିବା ସରକାରୀ ଭାବେ କୁହାଯାଇଛି। ତେବେ ତାଙ୍କୁ କରୋନା ଯୋଦ୍ଧା ଘୋଷଣା କରାଯିବା ସହ ତାଙ୍କ ପରିବାରକୁ ପ୍ରଧାନମନ୍ତ୍ରୀଙ୍କ କୋଭିଡ୍ ବୀମା ଯୋଜନାରେ ୫୦ ଲକ୍ଷ ଟଙ୍କାର କ୍ଷତିପୂରଣ ଦେବା ପାଇଁ ପୂର୍ବତଟ ରେଳପଥ ଶ୍ରମିକ ୟୁନିୟନ୍ ପକ୍ଷରୁ ଦାବି କରାଯାଇଛି। ନିଜ ଜୀବନକୁ ବାଜି ଲଗାଇ ଦେଶ ସେବାରେ ନିୟୋଜିତ ରେଳ କର୍ମଚାରୀଙ୍କୁ ଏବେ ସୁଦ୍ଧା ବୀମାଭୁକ୍ତ କରାଯାଇ ନ ଥିବାରୁ ୟୁନିୟନ୍ ପକ୍ଷରୁ କ୍ଷୋଭ ପ୍ରକାଶ ପାଇଛି। କରୋନାରେ ଶ୍ରୀ ଲେଙ୍କାଙ୍କ ମୃତ୍ୟୁ ହୋଇଥିବା ନେଇ କଟକ ଜିଲା ମୁଖ୍ୟ ଚିକିତ୍ସାଧିକାରୀ ଡା. ସତ୍ୟବ୍ରତ ଛୋଟରାୟ ସ୍ପଷ୍ଟ କରିଛନ୍ତି। ମେ ୨୫ ତାରିଖରେ ପ୍ରଥମ ଥର ପାଇଁ ପୂର୍ବତଟ ରେଳପଥର ଜଣେ ଟିଟିଇ ସଂକମ୍ରିତ ହୋଇଥିଲେ। ଏହା ପରଠାରୁ ସଂକ୍ରମିତ କର୍ମଚାରୀଙ୍କ ସଂଖ୍ୟା ବଢ଼ିବାରେ ଲାଗିଛି।
ଲକ୍‌ଡାଉନ୍‌ ସତ୍ତ୍ବେ ଦେଶର ଲାଇଫ୍‌ ଲାଇନ୍ କୁହାଯାଉଥିବା ରେଳବାଇ ନିରନ୍ତର ସେବା ଯୋଗାଇ ଚାଲିଛି। ମାର୍ଚ୍ଚ ମାସରୁ ରେଳବାଇ ଔଷଧ ତଥା ଅତ୍ୟାବଶ୍ୟକ ସାମଗ୍ରୀ ପରିବହନ କରୁଥିବା ବେଳେ ଗତ ମାସରୁ ଯାତ୍ରୀବାହୀ ଟ୍ରେନ୍ ଚଳାଚଳ ଆରମ୍ଭ ହୋଇଛି। ପ୍ଲାଟଫର୍ମରୁ ଆରମ୍ଭ କରି ଚଳନ୍ତା ଟ୍ରେନ୍ ପର୍ଯ୍ୟନ୍ତ ସବୁ ବିଭାଗର କର୍ମଚାରୀ ନିୟୋଜିତ ଅଛନ୍ତି। କେବଳ ରେଳବାଇର କର୍ମଚାରୀ ନୁହନ୍ତି, ଟ୍ରେନ୍‌ରେ ବିଭିନ୍ନ ପ୍ରକାର ସେବା ଯୋଗାଉ ଥିବା ଘରୋଇ ସଂସ୍ଥାର କର୍ମଚାରୀ ମଧ୍ୟ ଡ୍ୟୁଟି କରୁଛନ୍ତି। ତେବେ ସେହି କର୍ମଚାରୀ ଏବେ କରୋନାର ଶିକାର ହୋଇ ଚାଲିଛନ୍ତି। ଏବେ ସୁଦ୍ଧା ପୂର୍ବତଟ ରେଳପଥର ୨୩ ଜଣ କର୍ମଚାରୀ କରୋନା ସଂକ୍ରମିତ ହେଲେଣି।

ତେବେ ଆଜି ପ୍ରଥମ ଥର ପାଇଁ ଜଣେ ରେଳ କର୍ମଚାରୀ କରୋନା ଯୋଗୁଁ ପ୍ରାଣ ହରାଇଛନ୍ତି। ଆକ୍ରାନ୍ତଙ୍କ ମଧ୍ୟରେ ଟିଟିଇ, ମେକାନିକାଲ, ଇଲେକ୍ଟ୍ରିକାଲ କର୍ମଚାରୀଙ୍କ ସମେତ ଟ୍ରେନ୍‌ରେ ଶୌଚାଳୟ ସଫା କରୁଥିବା ଏବଂ ଅନ୍ୟ ସେବା ଯୋଗାଉ ଥିବା ଘରୋଇ ସଂସ୍ଥାର କର୍ମଚାରୀ ସାମିଲ ଅଛନ୍ତି। ପୂର୍ବତଟ ରେଳପଥ ଶ୍ରମିକ ୟୁନିୟନ୍‌ର ସଭାପତି ପ୍ରଦୀପ୍ତ କୁମାର ପାଟ୍ଟଶାଣୀ କହିଛନ୍ତି, ଶ୍ରୀ ଲେଙ୍କା ୭ ତାରିଖ ଦିନ ଡ୍ୟୁଟିରୁ ଘରକୁ​‌ ଫେରିଥିଲେ ଏବଂ ୧୦ ତାରିଖରେ ତାଙ୍କୁ ଜ୍ବର ଝାଡ଼ା ହୋଇଥିଲା। ୧୨ ତାରିଖରେ ସ୍ବାବ୍ ସଂଗ୍ରହ ପରେ ୧୫ ତାରିଖ ଦିନ ତାଙ୍କ ରିପୋର୍ଟ ପଜିଟିଭ୍ ଆସିଥିଲା। ଆଜି ସକାଳେ ସେ ଶେଷ ନିଃଶ୍ବାସ ତ୍ୟାଗ କରଛନ୍ତି। ସେ ସମ୍ପୂର୍ଣ୍ଣ ସୁସ୍ଥ ଥିଲେ ଓ ତାଙ୍କର କୌଣସି ରୋଗ ନଥିଲା। ଡ୍ୟୁଟି ପାଇଁ ସେ ନିଜ ଜୀବନ​‌ ଦେଇଛନ୍ତି। ପୂର୍ବତଟ ରେଳପଥରେ କାର୍ଯ୍ୟରତ ସମସ୍ତ କର୍ମଚାରୀଙ୍କୁ କୋଭିଡ୍‌ ଯୋଦ୍ଧା ଘୋଷଣା କରି ବୀମା ଭୁକ୍ତ କରିବା ପାଇଁ ଆମେ ବାରମ୍ବାର ଦାବି କରି ଆସୁଥିଲେ ସୁଦ୍ଧା ଏଥିପ୍ରତି ଦୃଷ୍ଟି ଦିଆନଯିବା ଦୁର୍ଭାଗ୍ୟଜନକ। ତେଣୁ କେନ୍ଦ୍ର ସରକାର ତଥା ରେଳ ବୋର୍ଡ ଆମର ଏହି ଦାବି ଯଥାଶୀଘ୍ର ପୂରଣ କଲେ କର୍ମଚାରୀଙ୍କ ମନୋବଳ ବୃଦ୍ଧି ପାଇବ ବୋଲି ଶ୍ରୀ ପଟ୍ଟଶାଣୀ ଜଣାଇଛନ୍ତି। ଲକ୍ ଡାଉନ୍ ପରେ ଅଦ୍ୟାବଧି ଓଡ଼ିଶାକୁ ୨୪୫ଟି ଶ୍ରମିକ ସ୍ପେଶାଲ ଟ୍ରେନ୍ ଆସିଥିବା ବେଳେ ନିୟମିତ ଭାବେ ୧୫ ଯୋଡ଼ା ସ୍ବତନ୍ତ୍ର ଟ୍ରେନ୍ ଚଳାଚଳ କରୁଛି। ପ୍ରତ୍ୟେକ ଦିନ ହଜାର ହଜାର ସଂଖ୍ୟାରେ ପ୍ରବାସୀ ଓଡ଼ିଆ ଫେରୁଥିବା ବେଳେ ଏଠାରୁ ବହୁ ସଂଖ୍ୟକ ଲୋକ ଅନ୍ୟ ରାଜ୍ୟକୁ ଯାଉଛନ୍ତି। ସଂକ୍ରମଣରୁ ରକ୍ଷା ପାଇବା ପାଇଁ ରେଳବାଇ ପକ୍ଷରୁ କର୍ମଚାରୀମାନଙ୍କୁ ଆବଶ୍ୟକୀୟ ସୁବିଧା ଯୋଗାଇ ଦିଆଯାଉଛି। ତଥାପି ଯାତ୍ରୀ ସେବାରେ ନିୟୋଜିତ ୨୩ କର୍ମଚାରୀ ସଂକ୍ରମିତ ହେଲେଣି। ଏହା ସତ୍ତ୍ବେ ପ୍ରତିକୂଳ ପରିସ୍ଥିତିକୁ ଖାତିର ନକରି ରେଳ କର୍ମଚାରୀମାନେ ନିଜ କର୍ତ୍ତବ୍ୟ ସମ୍ପାଦନରେ ବ୍ୟସ୍ତ ରହିଛନ୍ତି।