ବାଙ୍କୀ -ଡମପଡା ବ୍ଲକ ଅନ୍ତର୍ଗତ ହରିରାଜପୁର ପଞ୍ଚାୟତ ଅଧିନ ମହାନଦୀ କାଳିକା ଗାଧୁଆ ତୁଠ ନିକଟରେ ଜଣେ ଯୁବକଙ୍କର ଝୁଲନ୍ତା ଶବ ଏକ ସାହାଡା ଗଛରେ ଝୁଲୁଥିବା ଅବସ୍ଥାରେ ଉଦ୍ଧାର କରାଯାଇଛି । ସ୍ଥାନୀୟ ଲୋକ ମହାନଦୀକୁ ଯାଇଥିଲା ବେଳେ ଏଭଳି ଝୁଲନ୍ତା ଶବକୁ ଦେଖି ଭୟଭୀତ ହୋଇଥିଲେ । ଖବର ପ୍ରସାରିତ ହେଲା ପରେ ସ୍ଥାନୀୟ ଲୋକ ମାନେ ବହୁ ସଂଖ୍ୟାରେ ପହଁଚି ଦେଖିଥିଲେ ମଧ୍ୟ ଖବର ଲେଖା ହେବ ପର୍ଯ୍ୟନ୍ତ ଝୁଲନ୍ତା ଶବର ପରିଚୟ ମିଳି ପାରିନାହିଁ ।
ଏହା ଏକ ଆତ୍ମହତ୍ୟା ବୋଲି ସ୍ଥାନୀୟବାସୀ ସନ୍ଦେହ କରୁଛନ୍ତି । ଖବର ପାଇ ବାଙ୍କୀ ପୋଲିସ ଘଟଣା ସ୍ଥଳରେ ପହଁଚି ଘଟଣାର ଅନୁସନ୍ଧାନ କରି ଶବକୁ ବାଙ୍କୀ ଡାକ୍ତରଖାନାକୁ ନେବାର ବ୍ୟବସ୍ଥା କରିଛନ୍ତି । ଯୁବକ ଟିର ବୟସ ୩୦ ରୁ ୩୫ ବର୍ଷ ହେବ ବୋଲି ଅନୁମାନ କରାଯାଉଛି । ବାଙ୍କୀ ଥାନା ଅଧିକାରୀଙ୍କୁ ଏ ସମ୍ପର୍କରେ ପଚାରିବାରୁ ମୃତ ଯୁବକର ପରିଚୟ ମିଳି ନାହିଁ । ବାଙ୍କୀ ଡାକ୍ତରଖାନାର ଶବ ସଂରକ୍ଷଣ ପ୍ରକୋଷ୍ଠରେ ଶବକୁ ରଖାଯାଇଛି ଏବଂ ଘଟଣାର ଅନୁସନ୍ଧାନ ପ୍ରକ୍ରିୟା ଜାରି ରହିଥିବା କହିଛନ୍ତି ।
