ବାଙ୍କୀ: ଡମପଡ଼ା ବ୍ଲକ ଅଧିନ ଶିମିଳିପୁର ଗ୍ରାମପଞ୍ଚାୟତରେ ଶ୍ରମ ହରାଇ ଘରେ ବସିଥିବା ଜବ୍ କାର୍ଡଧାରୀ ଶ୍ରମିକମାନଙ୍କୁ ମନରେଗା ଯୋଜନାରେ କାମ ଯୋଗାଇ ଦିଆଯାଇଛି। ମଙ୍ଗଳବାର ଶିମିଳିପୁର ଗ୍ରାମଠାରୁ ବିଲିପଡ଼ା ରାସ୍ତା ପାର୍ଶ୍ବ ପାଣିନାଳ ଖନନ କାର୍ଯ୍ୟର ଶୁଭାରମ୍ଭ ହୋଇଛି। ସ୍ଥାନୀୟ ସରପଞ୍ଚ ସୁକାନ୍ତ ବେହେରା ଓ ସମିତିସଭ୍ୟ ଝୁନୁ ନାୟକ ସମ୍ମାନୀତ ଅତିଥି ଭାବରେ ଯୋଗଦେଇ ଜବ୍କାର୍ଡ ଧାରୀମାନଙ୍କ ଦ୍ୱାରା ସଞ୍ଚାଳିତ ମାଟିକାମକୁ ଶୁଭାରମ୍ଭ କରିଛନ୍ତି। କନିଷ୍ଠ ଯନ୍ତ୍ରୀ ସରିତା ଶତପଥିଙ୍କ ପ୍ରତ୍ୟକ୍ଷ ତତ୍ୱାବଧାନ ଏବଂ ଗ୍ରାମ ରୋଜଗାର ସାଥୀ କେଦାରସନ ବିଶ୍ୱାଳଙ୍କ ପରିଚାଳନାରେ ଏହି କାର୍ଯ୍ୟ ଅନୁଷ୍ଠିତ ହୋଇଛି। ଆଜି ମାଟି କାମରେ ୮୫ରୁ ଅଧିକ ଜବ୍କାର୍ଡ ଧାରୀ ପୁରୁଷ ଓ ମହିଳା ମାଟିକାମ କରୁଥିବା ବେଳେ ପ୍ରାୟ ୧୮୦୨ଶ୍ରମ ଦିବସ ସୃଷ୍ଟି କରାଯାଇ ଯୋଜନାରେ ପ୍ରାୟ ୪ଲକ୍ଷ ଟଙ୍କା ବ୍ୟୟ ହେବ ବୋଲି ସୂଚନା ମିଳିଛି।
ସୂଚନାଯୋଗ୍ୟ ଯେ, ଏହି ନାଳଟି ଖନନ ହେବା ଦ୍ୱାରା ଗ୍ରାମରୁ ବହି ଯାଉଥିବା ବର୍ଯ୍ୟଜଳ ଓ ବର୍ଷା ଜଳ ସହଜରେ ନିଷ୍କାସନ ହୋଇପାରିବ। ଶ୍ରମିକଙ୍କୁ କାମ ନଥିବା ସମୟରେ ପଞ୍ଚାୟତରେ ମନରେଗା ଯୋଜନାରେ କାମ ମିଳିଥିବାରୁ ଜବକାର୍ଡ ଧାରୀମାନେ ଖୁସି ପ୍ରକାଶ କରିଛନ୍ତି।
Comments are closed.