ବାହାନଗା: ବାଲେଶ୍ୱର ୧୬ ନଂ ଜାତୀୟ ରାଜପଥ ଓଳିଆପାଟଣା ଛକ ନିକଟରେ ଥିବା ପୋଲ ତଳକୁ ଶନିବାର ଏକ କାର ଖସି ପଡିବାରୁ ଏକ ଦୁଇ ବର୍ଷର ଶିଶୁକନ୍ୟାର ମୃତ୍ୟୁ ଘଟିଥିବା ବେଳ ୫ ଜଣ ଆହତ ହୋଇଛନ୍ତି। ୨ ବନ୍ଧୁ ପରିବାର ବାଲେଶ୍ୱର ଅଭିମୁଖେ ଭେରୋନା କାରରେ ଯାଉଥିବା ବେଳେ ଗାଡି ଆଗକୁ ହଠାତ ଏକ ଗାଈ ଚାଲିଆସିଥିଲା। ଯାହାଫଳରେ ଭାରସାମ୍ୟ ହରାଇ କାରଟି ପୋଲତଳକୁ ଗାଡ଼ିଟି ଖସିପଡ଼ିଥିଲା ଗାଡି଼ରେ ଥିବା ଜଣେ ୨ ବର୍ଷର କୁନିଶିଶୁ କନ୍ୟାର ମୃତ୍ୟୁ ହୋଇଥିବାବେଳେ ଅନ୍ୟ ୫ ଜଣ ଗୁରୁତର ଆହତ ଅବସ୍ଥାରେ ବାଲେଶ୍ୱର ସ୍ଥାନାନ୍ତର ହୋଇଛନ୍ତି। ଆହତଙ୍କ ୫ଜଣଙ୍କ ମଧ୍ୟରେ ଜଣେ ୬ ବର୍ଷର ଶିଶୁପୁତ୍ରର ସ୍ୱାସ୍ଥ୍ୟବସ୍ଥା ସଙ୍କଟାପନ୍ନ ହେବାରୁ ଅଧିକ ଚିକିତ୍ସା ପାଇଁ କଟକ ସ୍ଥାନାନ୍ତରିତ ହୋଇଥିବାବେଳେ ଖନ୍ତାପଡ଼ା ପୁଲିସ ଘଟଣାସ୍ଥଳରୁ ଗାଡି ଉଦ୍ଧାର କରି ତଦନ୍ତ ଜାରୀ ରଖିଛି। ସୂଚନାଯୋଗ୍ୟ ବାଲେଶ୍ୱର ଜିଲା ଖନ୍ତାପଡ଼ା ଥାନା ପଣପଣା ସେବା ସମବାୟ ସମିତିରେ କମ୍ପ୍ୟୁଟର କାର୍ୟ୍ୟ କରୁଥିବା ପ୍ରଫୁଲ୍ଲ ପଲେଇ ତାର ସ୍ତ୍ରୀ ସରୋଜିନି ପଲେଇ ଓ ତାଙ୍କର ୨ ବର୍ଷର କୁନି ଶିଶୁକନ୍ୟା ଏସ.ପି. ଶିବାଙ୍ଗିନୀ ପଲେଇ ଏବଂ ବନ୍ଧୁ ରତ୍ନାକର ପ୍ରଧାନ, ସ୍ତ୍ରୀ ରଶ୍ମିତା ପ୍ରଧାନ ଓ ତାଙ୍କର ୬ ବର୍ଷର ଶିଶୁପୁତ୍ର ସୈାମ୍ୟଜିତ ପ୍ରଧାନ ବାଲେଶ୍ୱର ଅଭିମୁଖେ ବାହାରିଥିଲେ। ଗାଡିର ମାଲିକ ତଥା ଚାଳକ ପ୍ରଫୁଲ୍ଲ ଗାଡି ଚଳାଉଥିବାବେଳେ ଅଚାନକ ଗାଡି ଆଗକୁ ଏକ ଗାଈ ଚାଲି ଆସିବାରୁ ଗାଡ଼ିଟି ଭାରସାମ୍ୟ ହରାଇ ପୋଲ ତଳକୁ ଖସିପଡ଼ିଥିବା ସ୍ଥାନୀୟ ଲୋକେ କହିଛନ୍ତି।
