ବଲାଙ୍ଗିର : ବଲାଙ୍ଗିର ଜାତୀୟ ରାଜପଥ-୨୬ର ବଲାଙ୍ଗିର-ଦେଓଗାଁ ରାସ୍ତାର ଖର୍ଲିକାନୀ ଛକରେ ବାଇକ୍ ଦୁର୍ଘଟଣାରେ ୨ ଯୁବବନ୍ଧୁଙ୍କ ମୃତ୍ୟୁ ହୋଇଛି। ମୃତକ ହେଲେ ବଲାଙ୍ଗିର ସଦର ଥାନା ଅନ୍ତର୍ଗତ ରତାଖଣ୍ଡି ଗାଁର ନିରଞ୍ଜନ ଭୁଏ (୨୨) ଏବଂ ଓମ୍ପ୍ରକାଶ ମହାଲିଙ୍ଗ (୨୧)।
ଦୁହେଁ ଶନିବାର ଅପରାହ୍ନରେ ବାଇକ୍ରେ ବଲାଙ୍ଗିରରୁ ରତାଖଣ୍ଡି ଫେରୁଥିଲେ। ଖର୍ଲିକାନୀ ଛକ ନିକଟରେ ବାଇକ୍ ଭାରସାମ୍ୟ ହରାଇ ରାସ୍ତାକଡ଼ ଗଛରେ ପିଟି ହୋଇଥିଲା। ଉଭୟଙ୍କୁ ଗୁରୁତର ଅବସ୍ଥାରେ ଲୋକେ ଭୀମ ଭୋଇ ଡାକ୍ତରଖାନାରେ ଭର୍ତ୍ତି କରିଥିଲେ। ଡାକ୍ତର ଦୁହିଁଙ୍କୁ ମୃତ ଘୋଷଣା କରିଥିଲେ।
ପୁଲିସ ଶବ ଜବତ କରି ଡାକ୍ତରଖାନା ବ୍ୟବଚ୍ଛେଦ ଗୃହରେ ରଖିଛି। ଓମ୍ପ୍ରକାଶଙ୍କ ବାପା ସରୋଜଙ୍କ ଦେଢ଼ ବର୍ଷ ପୂର୍ବେ ମୃତ୍ୟୁ ହୋଇଥିଲା। ଓମ୍ ପିକ୍ଅପ୍ ଚଳାଉଥିବା ବେଳେ ନିରଞ୍ଜନ ଗାଁରେ ଡିଜେ ବଜାଇବା ସହ ଭୁବନେଶ୍ବରରେ କାମ କରୁଥିଲେ। ଆଜି ସକାଳେ ନିରଞ୍ଜନ ଭୁବନେଶ୍ବରରୁ ଗାଁକୁ ଆସିଥିଲେ। ୨ ବନ୍ଧୁ ବାଇକରେ ବଲାଙ୍ଗିର ଆସି ବୁଲାବୁଲି କରିବା ପରେ ଅପରାହ୍ନରେ ଗାଁକୁ ଫେରୁଥିବାବେଳେ ଦୁର୍ଘଟଣାର ସମ୍ମୁଖୀନ ହୋଇଥିଲେ।
