ଟୋକିଓ : ଏଠାରେ ଚାଲିଥିବା ଜାପାନ ଓପନ ବ୍ୟାଡମିଣ୍ଟନ ଟୁର୍ଣ୍ଣାମେଣ୍ଟର ତୃତୀୟ ଦିନରେ ଭାରତର ପିଭି ସିନ୍ଧୁ ଓ ଏଚ.ଏସ.ପ୍ରଣୟ ସିଙ୍ଗଲ୍ସ ଇଭେଣ୍ଟରୁ ବିଦାୟ ନେଇଥିବାବେଳେ କିଦାମ୍ବି ଶ୍ରୀକାନ୍ତ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି।
ଗୁରୁବାର ଖେଳାଯାଇଥିବା ପୁରୁଷ ସିଙ୍ଗଲ୍ସ ପ୍ରିକ୍ୱାର୍ଟର ମ୍ୟାଚରେ ୭ମ ସିଡ୍ ଶ୍ରୀକାନ୍ତ ୨୧-୧୫, ୨୧-୧୪ ଗେମରେ ହଂକଂର ଭିନସେଣ୍ଟ୍ ୱଙ୍ଗ୍ଙ୍କୁ ପରାସ୍ତ କରିଛନ୍ତି। କ୍ୱାର୍ଟର ଫାଇନାଲରେ ଶ୍ରୀକାନ୍ତ ଦକ୍ଷିଣ କୋରିଆର ଲି ଡୋଙ୍ଗ୍ କିଉନ୍ଙ୍କୁ ଭେଟିବେ। ତେବେ ପୁରୁଷ ସିଙ୍ଗଲ୍ସର ଅନ୍ୟ ଏକ ପ୍ରିକ୍ୱାର୍ଟରରେ ଭାରତର ଏଚ.ଏସ.ପ୍ରଣୟ ୧୪-୨୧, ୧୭-୨୧ ଗେମରେ ଇଣ୍ଡୋନେସିଆର ଆନ୍ଥୋନୀ ଜିନ୍ତିଙ୍ଗ୍ଙ୍କଠାରୁ ହାରିଯାଇଛନ୍ତି। ଅପରପକ୍ଷରେ ଗୁରୁବାର ଖେଳାଯାଇଥିବା ମହିଳା ସିଙ୍ଗଲ୍ସର ଏକ ପ୍ରିକ୍ୱାର୍ଟର ମ୍ୟାଚରେ ବିଶ୍ୱର ୧୪ ନମ୍ବର ଖେଳାଳି ଚୀନର ଗାଓ ଫାଙ୍ଗ୍ଜି ସିଧାସଳଖ ୨୧-୧୮, ୨୧-୧୯ ଗେମରେ ୩ୟ ସିଡ୍ ମାନ୍ୟତାପ୍ରାପ୍ତ ସିନ୍ଧୁଙ୍କୁ ପରାସ୍ତ କରିଛନ୍ତି। ଏହି ମୁକାବିଲା ୫୫ ମିନିଟ ଧରି ଚାଲିଥିଲା। ସିନ୍ଧୁ ପ୍ରଥମ ଗେମରେ ଏକଦା ୨-୮ ପଏଣ୍ଟରେ ପଛୁଆ ରହିଥିଲେ ସୁଦ୍ଧା ଏହି ବ୍ୟବଧାନକୁ ହ୍ରାସ କରିବା ସହ ୧୭-୧୪ରେ ଆଗେଇ ଯାଇଥିଲେ। ତେବେ ସିନ୍ଧୁଙ୍କ ଏକାଧିକ ତ୍ରୁଟିରୁ ଫାଇଦା ଉଠାଇ ଫାଙ୍ଗ୍ଜି ଏହି ଗେମକୁ ୨୧-୧୮ରେ ଜିତିଥିଲେ। ଦ୍ୱିତୀୟ ଗେମରେ ଫାଙ୍ଗ୍ଜି ଏକଦା ୨୦-୧୫ ପଏଣ୍ଟରେ ଆଗୁଆ ରହିଥିଲେ। ସିନ୍ଧୁ ଲଢୁଆ ପ୍ରଦର୍ଶନ କରି ୪ଟି ଗେମ ପଏଣ୍ଟ ବଞ୍ଚାଇଥିଲେ ସୁଦ୍ଧା ଫାଙ୍ଗ୍ଜି ଶେଷରେ ୨୧-୧୯ରେ ବିଜୟୀ ହୋଇ କ୍ୱାର୍ଟରକୁ ଉନ୍ନୀତ ହୋଇଛନ୍ତି। ବିଗତ ଏକ ବର୍ଷ ମଧ୍ୟରେ ସିନ୍ଧୁ ପ୍ରଥମ ଥର କୌଣସି ଟୁର୍ଣ୍ଣାମେଣ୍ଟର ପ୍ରାରମ୍ଭିକ ପର୍ଯ୍ୟାୟରୁ ବିଦାୟ ନେଇଛନ୍ତି।
ପୁରୁଷ ଡବଲ୍ସର କ୍ୱାର୍ଟର ଫାଇନାଲରେ ଭାରତୀୟ ଯୋଡି ମନୁ ଅତ୍ରି ଓ ସୁମିତ ରେଡ୍ଡି ୧୮-୨୧, ୨୧-୧୬, ୧୨-୨୧ ଗେମରେ ଚୀନର ହି ଜିତିଙ୍ଗ୍ ଓ ତାନ୍ କ୍ୱିଆଙ୍ଗ୍ଙ୍କଠାରୁ ପରାସ୍ତ ହୋଇଥିବାବେଳେ ମିକ୍ସଡ ଡବଲ୍ସ ପ୍ରିକ୍ୱାର୍ଟରରେ ମାଲେସିଆର ଚାନ୍ ପେଙ୍ଗ୍ ସୁନ୍ ଓ ଲିଉ ୟିଙ୍ଗ୍ ଘୋ ୨୧-୧୬, ୨୧-୧୬ ଗେମରେ ଭାରତର ପ୍ରଣବ ଚୋପ୍ରା ଓ ସିକ୍କି ରେଡ୍ଡିଙ୍କୁ ହରାଇଛନ୍ତି।
ସିନ୍ଧୁ, ପ୍ରଣୟ ପରାସ୍ତ; କ୍ୱାର୍ଟରରେ ଶ୍ରୀକାନ୍ତ
Popular Categories
Previous article
Next article