ଆଠଗଡ : ଆଠଗଡ ଥାନା ଅନ୍ତର୍ଗତ ସମସରପୁର ପଞ୍ଚାୟତର ଅମୃତ ମଣୋହିପାଟଣା ଗ୍ରାମରେ ଶରତ ରାସ ଯାତ୍ରାକୁ ନେଇ ଦୁଇଗୋଷ୍ଠୀ ମୁହାଁମୁହିଁ ହେବା ସହ ଆକ୍ରମଣ ଓ ପ୍ରତିଆକ୍ରମଣରେ କିଛି ଲୋକ ଆହତ ହୋଇଥିବା ଜଣାପଡିଛି । ଏହି ଘଟଣା ସଂପର୍କରେ ଦୁଇଗୋଷ୍ଠୀ ପକ୍ଷରୁ ଦୁଇଟି ପୃଥକ ଏତଲା ଥାନାରେ ଦାୟାର ହୋଇଛି । ଅମୃତ ମଣୋହିପାଟଣା ଗ୍ରାମରେ କାର୍ତ୍ତିକ ପଞ୍ଚକ ଠାରୁ ପୂଣ୍ଣିମା ପର୍ଯ୍ୟନ୍ତ ଶରତ ରାସ ଯାତ୍ରା ଅନୁଷ୍ଠିତ ହୋଇଥାଏ । ଏହି ଯାତ୍ରାରେ ଆଠଗଡର ଆରାଧ୍ୟ ପ୍ରଭୁ ଶ୍ରୀ ଅଟ୍ଟାଳି ଜଗନ୍ନାଥଙ୍କ ଚଳନ୍ତି ପ୍ରତିମାକୁ ଗ୍ରାମ ପକ୍ଷରୁ ନିମନ୍ତ୍ରଣ କରି ନେବା ସହ ଶ୍ରୀ ଜୀଉଙ୍କୁ ସୁସଜ୍ଜିତ ବିମାନରେ ଗ୍ରାମ ପରିକ୍ରମା କରାଯାଇଥାଏ। ତା ସହିତ ପାଞ୍ଚଦିନ ଧରି ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ଆୟୋଜିତ ହୋଇଥାଏ । ଚଳିତ ବର୍ଷ ଏହି ଯାତ୍ରାରେ ୧ନଂ ଜୋନ ଜିଲ୍ଲାପରିଷଦ ସଭ୍ୟା ଶାନ୍ତିଲତା ବେହେରାଙ୍କୁ ଉଦ୍ଘାଟନ ପାଇଁ ଗୋଟିଏ ଗୋଷ୍ଠୀ ନିମନ୍ତ୍ରଣ କରିଥିଲେ। କିନ୍ତୁ ଗ୍ରାମ ସଭାପତିଙ୍କ ସହ ଅନ୍ୟଏକ ଗୋଷ୍ଠୀ ଏହାକୁ ବିରୋଧ କରିଥିଲେ। ଫଳରେ ଉଭୟ ଗୋଷ୍ଠୀ ମଧ୍ୟରେ ବିବାଦ ଉପୁଜିବା ସହ ଶୁକ୍ରବାର ରାତିରେ ଉଭୟ ଗୋଷ୍ଠୀ ମୁହାଁମୁଁହି ହୋଇଥିଲେ। ସେମାନଙ୍କ ମଧ୍ୟରେ ସଂଘର୍ଷ ଘଟି କିଛି ଲୋକ ଆହତ ହୋଇଥିବା ଜଣାପଡିଛି । ବିଜେଡି ଦଳର ଦୁଇଗୋଷ୍ଠୀ ମଧ୍ୟରେ ଏହି ଗଣ୍ଡଗୋଳ ଘଟିଥିବାରୁ ସେହି ଗ୍ରାମରେ ଦଳର ଗୋଷ୍ଠୀ କନ୍ଦଳରେ ଦାଣ୍ଡରେ ପଡି ହାଟରେ ଗଡୁଛି । ଜିଲ୍ଲା ପରିଷଦ ସଭ୍ୟାଙ୍କୁ ନିମନ୍ତ୍ରଣ କରିଥିବା ଗୋଷ୍ଠୀର ଗୌରାଙ୍ଗ ଚରଣ ମନ୍ତ୍ରୀ ଏବଂ ଏହାକୁ ବିରୋଧ କରୁଥିବା ଗ୍ରାମ ସଭାପତି ପୂର୍ଣ୍ଣଚନ୍ଦ୍ର ରାଉତଙ୍କ ପକ୍ଷରୁ ପୃଥକ ଭାବେ ଦୁଇଟି ଏତଲା ଆଠଗଡ ଥାନାରେ ଦିଆଯାଇଛି । ଏତଲାକୁ ଭିତ୍ତିକରି ପୁଲିସ ତଦନ୍ତ ଜାରି ରଖିଥିବା ତଦନ୍ତକାରୀ ଅଧିକାରୀ ବିଶ୍ୱଜିତ୍ ଜେନା ଓ ଆଇଆଇସି ବାମଦେବ ସ୍ୱାଇଁ ପ୍ରକାଶ କରିଥିଲେ।
Popular Categories
Previous article
Next article