ଜମ୍ମୁ: ପାକିସ୍ତାନ ସେନା ଗୁଳିରେ ପୁଣି ଜଣେ ଭାରତୀୟ ଯବାନ ପ୍ରାଣ ହରାଇଛନ୍ତି। ଜମ୍ମୁ-କଶ୍ମୀର ରାଜୌରୀ ଜିଲାର ନିୟନ୍ତ୍ରଣ ରେଖା ନିକଟରେ ଭାରତୀୟ ସେନାର ପାଟ୍ରୋଲିଂ ଟିମ୍ ଉପରକୁ ପାକିସ୍ତାନ ସେନା ଅଚାନକ ଗୁଳିବର୍ଷଣ କରିଥିଲା। ଏଥିରେ ରାଇଫଲ୍ ମ୍ୟାନ୍ ବିକାଶ ଗୁରୁଙ୍ଗ ଗୁରୁତର ଆହତ ହୋଇଥିଲେ। କିଛି ସମୟ ପରେ ତାଙ୍କର ମୃତ୍ୟୁ ଘଟିଥିଲା। ସେ ମଣିପୁରର ଖୁଙ୍କା ଖୁକି ଗ୍ରାମରେ ବୋଲି ଜଣାପଡ଼ିଛି। ବିକାଶଙ୍କ ଘରେ ମା’ଙ୍କ ବ୍ୟତୀତ ଆଉ କେହି ନାହାନ୍ତି। ବିକାଶଙ୍କ ମୃତ୍ୟୁ ପରେ ତାଙ୍କ ମା’ ଅସହାୟ ହୋଇପଡ଼ିଛନ୍ତି।
ଏଲ୍ଓସିର ୭୦୦ ମିଟର ଭିତରେ ସେନା ଟିମ୍ ପାଟ୍ରୋଲିଂ କରୁଥିବା ବେଳେ ପାକିସ୍ତାନ ପଟୁ ଗୁଳି ବର୍ଷଣ ହୋଇଥିବା ଜଣେ ସେନା ଅଧିକାରୀ ସୂଚନା ଦେଇଛନ୍ତି। ଇଦ୍ ଉତ୍ସବ ବେଳେ ପାକିସ୍ତାନ ସେନାର ଏହି କାର୍ଯ୍ୟକୁ ଭାରତୀୟ ସେନା ଅଧିକାରୀ ନିନ୍ଦା କରିଛନ୍ତି। ଏହି ଘଟଣା ପରେ ଭାରତ-ପାକ୍ ସୀମାରେ ଇଦ୍ ଅବସରରେ ହେଉଥିବା ମିଷ୍ଟାନ୍ନ ବଣ୍ଟନ କାର୍ଯ୍ୟକ୍ରମକୁ ଭାରତୀୟ ସେନା ପକ୍ଷରୁ ବାତିଲ କରାଯାଇଛି। ଏହାପୂର୍ବରୁ ଜୁନ୍ ୧୩ ତାରିଖରେ ପାକିସ୍ତାନ ସେନା ଗୁଳିରେ ଜଣେ ଆସିଷ୍ଟାଣ୍ଟ କମାଣ୍ଡାଣ୍ଟଙ୍କ ସମେତ ୪ ଜଣ ବିଏସ୍ଏଫ୍ଙ୍କ ଯବାନଙ୍କ ମୃତ୍ୟୁ ଘଟିଥିଲା।
