ମୁମ୍ବଇ: ‘ବାଗି’ ଚଳଚ୍ଚିତ୍ରର ଦୁଇଟି ଯାକ ଭାଗ ସୁପରହିଟ୍ ହୋଇଥଇବାବେଳେ ପ୍ରଯୋଜକ ମହଲ ବହୁ ପୂର୍ବରୁ ଏହାର ତୃତୀୟ ଭାଗ ସମ୍ପର୍କରେ ଘୋଷଣା କରିଥିଲା। ମୁଖ୍ୟ ଭୂମିକାରେ ଟାଇଗର୍ ଶ୍ରଫ୍, ଶ୍ରଦ୍ଧା କପୁର ଅଭିନୟ କରିବେ ବୋଲି ସ୍ପଷ୍ଟ ହୋଇଛି। ତେବେ ଏଥରକ ନୂଆ ମୁହଁ ଭାବେ ଏଇ ଟିମ୍ରେ ଅଙ୍କିତା ଲୋଖଣ୍ଡେ ଦେଖାଦେବେ। ୨୦୦୯ରେ ଏକତା କପୁର ପ୍ରଯୋଜିତ ‘ପବିତ୍ର ରିସ୍ତା’ ଧାରାବାହିକରେ ଅଙ୍କିତା କାମ ଆରମ୍ଭ କରିଥିଲେ। ମାସ କେଇଟାରେ ଅଙ୍କିତା ଏଥିରେ ଲୋକପ୍ରିୟତା ପାଇଥିଲେ। ଏହା ପରେପରେ ସେ ସିନେଜଗତରେ କ୍ୟାରିୟର କରିବା ନେଇ ଚେଷ୍ଟା କରିଥିଲେ। ସେ ସମୟରେ କିନ୍ତୁ ତାଙ୍କୁ ସଫଳତା ମିଳିନଥିଲା। ବହୁ ଚେଷ୍ଟା କରିବା ପରେ ଅଙ୍କିତା ପ୍ରଥମଥର ‘ମଣିକର୍ଣ୍ଣିକା’ ଚଳଚ୍ଚିତ୍ରରେ କଙ୍ଗନା ରଣାୱତ୍ଙ୍କ ସହ କାମ କରିବାର ସୁଯୋଗ ପାଇଲେ। ତାଙ୍କ ଅଭିନୟକୁ ବିଭିନ୍ନ ମହଲରେ ପ୍ରଶଂସା କରାଯାଇଥିଲା। ଏହା ପରେ ଅଙ୍କିତା ଅନ୍ୟ ଏକ ସୁଯୋଗ ଅପେକ୍ଷାରେ ମଧ୍ୟ ଥିଲେ। ‘ବାଗି-୩’ରେ ତାଙ୍କୁ ସୁଯୋଗ ମିଳିଥିବାରୁ ଖୁବ୍ ଖୁସି ଥିବା ଅଙ୍କିତା କହିଛନ୍ତି, ଏଥିରେ ସେ ଶ୍ରଦ୍ଧା କପୁରଙ୍କ ସାନ ଭଉଣୀ ଭୂମିକାରେ ଦେଖାଦେବେ।
Comments are closed.