ଡେସ୍କ: ଖଲିସ୍ତାନ ସପକ୍ଷବାଦୀ ନେତା ତଥା ‘ୱାରିସ୍ ପଞ୍ଜାବ ଦେ’ ମୁଖ୍ୟ ଅମୃତପାଲ ସିଂହ ଓ ତାଙ୍କ ସହଯୋଗୀ ଉତ୍ତରାଖଣ୍ଡରେ ଥିବା ସନ୍ଦେହରେ ସେଠାରେ ସତର୍କତା ଜାରି କରାଯାଇଛି। ସେ ତାର ସହଯୋଗୀ ସହ ଉତ୍ତରାଖଣ୍ଡରେ ପ୍ରବେଶ କରିଥିବା ପୁଲିସ ସୂଚନା ପାଇଛି ତେଣୁ କୌଣସି ପ୍ରକାର ଅପ୍ରୀତିକର ପରିସ୍ଥିତି ଏଡ଼ାଇବାକୁ ଓ ଅମୃତପାଲକୁ ଗିରଫ କରିବା ଉଦ୍ଦେଶ୍ୟରେ ଏହି ସତର୍କତା ଜାରି କରାଯାଇଛି। ଡେରାଡୁନ, ହରିଦ୍ୱାର ଓ ଉଦ୍ଧମସିଂ ନଗର ଅଞ୍ଚଳରେ ସତର୍କତା ଜାରି କରାଯାଇଥିବା ସେଠାକାର ପୁଲିସ ମହାନିର୍ଦ୍ଦେଶକ ଅଶୋକ କୁମାର କହିଛନ୍ତି।
ପୁଲିସ ପକ୍ଷରୁ ସେହି ୩ଟି ଜିଲ୍ଲାରେ ବ୍ୟାପକ ଖାନତଲାସୀ କରାଯାଉଛି ଓ ସୀମାବର୍ତ୍ତୀ ଅଂଚଳରେ ଯାନବାହାନ ଯାଞ୍ଚ କରାଯାଉଛି। ଏହି ଘଟଣାରେ ପଞ୍ଜାବରେ ଆସନ୍ତି ସୃଷ୍ଟି କରୁଥିବା ଅଭିଯୋଗରେ ୨୦୭ ଜଣଙ୍କୁ ଗିରଫ କରାଯାଇଥିବା ବେଳେ ସେମାନଙ୍କ ମଧ୍ୟରୁ ୩୦ ଜଣଙ୍କ ନାମରେ ପୂର୍ବରୁ ଅପରାଧିକ ମାମଲା ରହିଥିବା ଜଣାପଡିଛି।
ଗତକାଲି ଅମୃତପାଲ ସିଂହ ଓ ତାଙ୍କ ସହଯୋଗୀ ପାପଲପ୍ରୀତ ସିଂହଙ୍କୁ ନିଜ ଘରେ ଆଶ୍ରୟ ଦେଇଥିବା ଜଣେ ମହିଳାଙ୍କୁ ହରିୟାଣା ପୁଲିସ ଗିରଫ କରିଛି। ଗିରଫ ମହିଳା ହେଉଛନ୍ତି ବଲଜିତ କୌର। ପୁଲିସ କହିଛି ଯେ ଗତ ରବିବାର ଅମୃତପାଲ ପଞ୍ଜାବରୁ ଫେରାର ହୋଇ ହରିୟାଣା ଚାଲିଆସିବା ପରେ ବଲ୍ଜିତ ଘରେ ଆଶ୍ରୟ ନେଇଥିଲେ। ବଲଜିତ୍ଙ୍କୁ ଏବେ ପଞ୍ଜାବ ପୁଲିସକୁ ହସ୍ତାନ୍ତର କରାଯାଇଥିବା କୁରୁକ୍ଷେତ୍ର ଏସପି ସୁରିନ୍ଦର ସିଂହ ଭୋରିଆ କହିଛନ୍ତି। ସେହିପରି ଅମୃତପାଲଙ୍କ ସୁରକ୍ଷା ଦାୟିତ୍ବରେ ଥିବା ତେଜିନ୍ଦର ସିଂହ ଗିଲ୍ ନାମକ ଜଣେ ବ୍ୟକ୍ତିଙ୍କୁ ମଧ୍ୟ ପୁଲିସ ଗିରଫ କରିଛି। ତେଜିନ୍ଦରଙ୍କ ଘର ଲୁଧିଆନା ଜିଲାର ଖାନ୍ନା ଅଞ୍ଚଳରେ। ତେଜିନ୍ଦର ପାଖରେ ଅସ୍ତ୍ରଶସ୍ତ୍ର ରଖିବାର ଲାଇସେନ୍ସ ନଥିବାବେଳେ ସେ ଅନେକ ସମୟରେ ସାମାଜିକ ଗଣମାଧ୍ୟମରେ ଅସ୍ତ୍ରଶସ୍ତ୍ର ପ୍ରଦର୍ଶନ କରିଥାଏ। ଏଥିପାଇଁ ତେଜିନ୍ଦର ବିରୋଧରେ ଆଇପିସି ଧାରା ୧୮୮ ଅନୁଯାୟୀ ମାମଲା ରୁଜୁ କରାଯାଇଛି। ବର୍ତ୍ତମାନ ସୁଦ୍ଧା ଅମୃତପାଲଙ୍କ ୨୦୭ ଜଣ ସହଯୋଗୀଙ୍କୁ ଗିରଫ କରାଗଲାଣି। ତେବେ ଏହି ଘଟଣାରେ କୌଣସି ନିରୀହ ଲୋକଙ୍କୁ ହଇରାଣ କରାଯାଇ ନଥିବା ପୁଲିସ କହିଛି।
