ଡେସ୍କ: ନିର୍ବାଚନ ଆୟୋଗ ଆନୁଷ୍ଠାନିକ ଭାବେ ଅଜିତ ପାୱାର ଗୋଷ୍ଠୀକୁ ରାଷ୍ଟ୍ରବାଦୀ କଂଗ୍ରେସ ପାର୍ଟି ଭାବେ ମାନ୍ୟତା ଦେଇଛନ୍ତି। ଅଜିତ ପାୱାର ଗୋଷ୍ଠୀକୁ ଦଳର ଚିହ୍ନ ଦେଇଛନ୍ତି କମିଶନ। ବିଧାୟକ ଦଳର ସଂଖ୍ୟାଗରିଷ୍ଠତା ପରୀକ୍ଷା ଆଧାରରେ କମିଶନ ନିଷ୍ପତ୍ତି ଗ୍ରହଣ କରିଛନ୍ତି।
ଅଜିତ ପାୱାରଙ୍କ ନେତୃତ୍ୱାଧୀନ ଗୋଷ୍ଠୀ ହେଉଛି ରାଷ୍ଟ୍ରବାଦୀ କଂଗ୍ରେସ ପାର୍ଟି ଏବଂ ଦଳର ନାମ ଓ ଚିହ୍ନ ବ୍ୟବହାର କରିବାର ଅଧିକାର ରହିଛି ବୋଲି ନିର୍ବାଚନ ଆୟୋଗ ତାଙ୍କ ନିର୍ଦ୍ଦେଶରେ କହିଛନ୍ତି। ବୁଧବାର ଅପରାହ୍ନ ୩ଟା ସୁଦ୍ଧା ଶରଦ ପାୱାର ଗୋଷ୍ଠୀକୁ ଦଳର ନୂଆ ନାମ ସହ ତିନୋଟି ବିକଳ୍ପ ଦାଖଲ କରିବାକୁ କମିଶନ କହିଛନ୍ତି। ୬ ମାସ ମଧ୍ୟରେ ୧୦ଟି ଶୁଣାଣି ପରେ ନିର୍ବାଚନ କମିଶନ ଏନସିପି ବିବାଦର ସମାଧାନ କରିଛନ୍ତି।
ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଅଜିତ ପାୱାର ଟ୍ୱିଟ୍ କରି କହିଛନ୍ତି ଯେ ତାଙ୍କ ଗୋଷ୍ଠୀକୁ ପ୍ରକୃତ ରାଷ୍ଟ୍ରବାଦୀ କଂଗ୍ରେସ ପାର୍ଟି (ଏନସିପି) ଭାବରେ ସ୍ୱୀକୃତି ଦେବା ପାଇଁ ନିର୍ବାଚନ ଆୟୋଗଙ୍କ ନିଷ୍ପତ୍ତିକୁ ସେ ଗ୍ରହଣ କରିଛନ୍ତି। ରାଷ୍ଟ୍ରବାଦୀ କଂଗ୍ରେସ ପାର୍ଟିର ରାଷ୍ଟ୍ରୀୟ ସଭାପତି ଭାବରେ ଶ୍ରୀ ପାୱାର ତାଙ୍କ ଟ୍ୱିଟର ଆକାଉଣ୍ଟରେ ଏହି ବାର୍ତ୍ତା ପୋଷ୍ଟ କରିଛନ୍ତି।
ଏହି ରାୟକୁ ସ୍ୱାଗତ କରି ରାଜ୍ୟସଭା ସାଂସଦ ତଥା ଏନସିପି କାର୍ଯ୍ୟକାରୀ ସଭାପତି ପ୍ରଫୁଲ୍ଲ ପଟେଲ କହିଛନ୍ତି ଯେ ନିର୍ବାଚନ ଆୟୋଗ ସେମାନଙ୍କ ସପକ୍ଷରେ ରାୟ ଦେଇଥିବାରୁ ସେ ସନ୍ତୁଷ୍ଟ।
Comments are closed.