ୱାଶିଂଟନ: ଆଫଗାନିସ୍ତାନରେ ତାଲିବାନ ସଂଗଠନ କ୍ଷମତା ଦଖଲ ପରେ ଏଠାରେ ପ୍ରାୟ ୬୪୦୦ ସାମ୍ବାଦିକ କର୍ମ ହରାଇଛନ୍ତି। ତଥ୍ୟ ଅନୁଯାୟୀ ତାଲିବାନଙ୍କ କ୍ଷମତା ଦଖଲ ପରେ ଆଫଗାନିସ୍ତାନ ଗଣମାଧ୍ୟମ କ୍ଷେତ୍ରରେ ବ୍ୟାପକ ପରିବର୍ତ୍ତନ ହୋଇଛି। ଅନେକ ଗଣମାଧ୍ୟମ ସଂସ୍ଥାକୁ ସମ୍ପୂର୍ଣ୍ଣ ରୂପେ ବନ୍ଦ କରିଦିଆଯାଇଛି। ରିପୋର୍ଟସ ୱିଦାଉଟ୍ ବର୍ଡର (ଆରଏସ୍ଏଫ୍) ଏବଂ ଆଫଗାନ ଇଣ୍ଡିପେଣ୍ଡେଣ୍ଟ ଜର୍ଣ୍ଣାଲିଷ୍ଟ ଆସୋସିଏସନ୍ ପକ୍ଷରୁ ହୋଇଥିବା ସର୍ଭେରେ ଏହା କୁହାଯାଇଛି। ଦେଶରେ ପ୍ରାୟ ୨୩୧ଟି ମିଡିଆ ସଂସ୍ଥାକୁ ସମ୍ପୂର୍ଣ୍ଣ ବନ୍ଦ କରିଦିଆଯାଇଛି। ଯାହା ଦେଶର ମୋଟ ଗଣମାଧ୍ୟମ ସଂସ୍ଥାର ପାଖାପାଖି ଅଧା। ୬୦% ସାମ୍ବାଦିକ ଏବେ କର୍ମ ହରାଇଛନ୍ତି। ୮୦% ମହିଳା ସାମ୍ବାଦିକ ବୃତ୍ତି ହରାଇଛନ୍ତି।
ତାଲିବାନଙ୍କ କ୍ଷମତା ଦଖଲ ପୂର୍ବରୁ ଆଫଗାନିସ୍ତାନରେ ୫୪୩ଟି ଗଣମାଧ୍ୟମ ସଂସ୍ଥା ଥିଲା। ନଭେମ୍ବର ମାସ ବେଳକୁ ଏଥିରୁ ମାତ୍ର ୩୧୨ଟି କାର୍ଯ୍ୟକ୍ଷମ ରହିଥିଲା। ସରକାର ଗଠନ ସମୟରେ ତାଲିବାନ ସରକାର ପ୍ରତିଶ୍ରୁତି ଦେଇଥିଲା ଯେ ଏହା ମହିଳା ଅଧିକାରକୁ ସୁରକ୍ଷା, ଗଣମାଧ୍ୟମର ସ୍ବାଧୀନତା ଦେବ। ଏବେ କିନ୍ତୁ ତାଲିବାନ ସରକାର ବିରୋଧରେ ବିକ୍ଷୋଭ ପ୍ରଦର୍ଶନ କରୁଥିବା ଲୋକଙ୍କ ଖବର ପ୍ରସାରଣ କରୁଥିବା ଗଣମାଧ୍ୟମ ସଂସ୍ଥାକୁ ଦମନ କରାଯାଉଛି।
