ଛତ୍ରପୁର: ଗଞ୍ଜାମ ଜିଲା ଆସିକା ତହସିଲର ଅତିରିକ୍ତ ତହସିଲଦାର ସୌଦାଗର ବେହେରାଙ୍କ ପରିବାରକୁ କୁଳ ବାସନ୍ଦା ଅଭିଯୋଗ ଘଟଣାରେ ପୁଲିସ ୯ଜଣଙ୍କ ନାମରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ଅନ୍ୟ ଜାତିର ଝିଅକୁ ବିବାହ କରିବାରୁ ଅତିରିକ୍ତ ତହସିଲଦାର ଏବଂ ତାଙ୍କ ପରିବାରକୁ କୈବର୍ତ୍ତ ସମାଜ କୁଳରୁ ବାସନ୍ଦ କରାଯାଇଥିଲା। ଏ ସଂକ୍ରାନ୍ତରେ ଛତ୍ରପୁର ଥାନାରେ ଅତିରିକ୍ତ ତହସିଲଦାରଙ୍କ ବାପା ବିଜୟ ବେହେରା ଲିଖିତ ଅଭିଯୋଗ କରିଥିଲେ । ଅଭିଯୋଗକୁ ଭିତ୍ତି କରି ଛତ୍ରପୁର ଥାନା ପୁଲିସ କୁଳର ୯ ଜଣଙ୍କ ନାମରେ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ଥାନା ଅଧିକାରୀ ସବ୍ୟସାଚୀ ମଲ୍ଲ ସୂଚନା ଦେଇଛନ୍ତି।
ସୂଚନାନୁସାରେ, ଅତିରିକ୍ତ ତହସିଲଦାର ସୌଦାଗର ବେହେରାଙ୍କ ଘର ଛତ୍ରପୁର ଥାନା ଅନ୍ତର୍ଗତ ମୁନିଷିପେଣ୍ଠ ଗ୍ରାମରେ । ସେ ଗତ ଫେବୃଆରୀ ମାସରେ ଅନ୍ୟ ଏକ ଜାତିର ଝିଅକୁ ବିବାହ କରିଥିଲେ। ଏଥିରେ କୈବର୍ତ୍ତ ସମାଜ ପକ୍ଷରୁ ତାଙ୍କ ପରିବାରକୁ କୁଳ ବାସନ୍ଦ କରାଯାଇଥିଲା। ଫେବୃଆରୀ ମାସରେ ଅତିରିକ୍ତ ତହସିଲଦାର ବିବାହ କରିବା ସମ୍ପର୍କରେ ତାଙ୍କ ବାପା କୁଳ ସମାଜକୁ ଅବଗତ କରିଥିଲେ। ପୁଅ ସହିତ ରହିବ, ନା’ ଅଲଗା ରହିବ ବୋଲି କୁଳ ସମାଜ ପକ୍ଷରୁ ତାଙ୍କ ବାପାକୁ ପଚରା ଯାଇଥିଲା। ପୁଅ ସହିତ ରହିବାକୁ ବାପା ବିଜୟ ଜଣାଇବାରୁ ଏହା ଉପରେ କୁଳ ବିଚାର କରିବ ବୋଲି ସେ ସମୟରେ କୁହାଯାଇଥିଲା । ଚଳିତ ମାସ ୨୩ ତାରିଖରେ ଗାଁରେ ଏକ ବିବାହ ଭୋଜିକୁ ବିଜୟଙ୍କୁ ନିମନ୍ତ୍ରଣ କରାଯାଇଥିଲା । ଭୋଜି ଖାଉଥିବା ବେଳେ ତାଙ୍କର ଖଲିପତ୍ର ଉଠାଇ ନିଆଯାଇଥିଲା ଏବଂ ତାଙ୍କୁ ଏହି ଭୋଜିକୁ କିଏ ନିମନ୍ତ୍ରଣ କରିଛି ବୋଲି କହି ଅପମାନିତ କରାଯାଇଥିଲା । ତେବେ ବାସନ୍ଦ ଅଭିଯୋଗକୁ କୁଳ ସମାଜ ପକ୍ଷରୁ ଖଣ୍ଡନ କରାଯାଇଛି।
