ପାଟଣା : ଘଟଗାଁ ବ୍ଲକ ଅନ୍ତର୍ଗତ ଝାରବେଡ଼ା ଚାଉଳ କଳ ନିକଟରେ ଆଜି ଅପରାହ୍ନରେ ଏକ ଟ୍ରକ୍ ସାମ୍ନାରେ ପିଟି ହୋଇ ଜଣେ ବାଇକ୍ ଆରୋହୀର ଘଟଣା ସ୍ଥଳରେ ମୃତ୍ୟୁ ଘଟିଛି। ଅନ୍ୟ ଦୁଇ ଯୁବକ ଗୁରୁତର ହୋଇଛନ୍ତି। ଚାନ୍ଦପଶି ଛକରୁ ଏକ ବାଇକ୍ ଯୋଗେ ଝାରବେଡା ଗ୍ରାମର ଦଶରଥ ଖଣ୍ଡେଇଙ୍କ ପୁଅ ବାପୁନ୍ ଖଣ୍ଡେଇ, ଚୈତନି ନାଏକଙ୍କ ପୁଅ ଝୁଲୁ ନାଏକ ଓ ସୁଦର ମୁଣ୍ଡାଙ୍କ ପୁଅ ଝାରବେଡା ଗ୍ରାମକୁ ବାଇକ୍ ଯୋଗେ ଫେରୁଥିବା ବେଳେ ବିପରୀତ ଦିଗରୁ ଆସୁଥିବା ଏକ ଟ୍ରକ ସହ ଧକ୍କା ହୋଇଥିଲା।
ଟ୍ରକର ଚାଳକ ସାମ୍ନାରୁ ଆସିଲୁଥିବା ବାଇକ୍ ଚାଳକଙ୍କ ହାବ ଭାବ ଦେଖି ଟ୍ରକଟିକୁ ରାସ୍ତା କଡ଼ରେ ଠିଆ କରି ଦେଇଥିଲେ ମଧ୍ୟ ଯୁବକ ମାନଙ୍କ ବାଇକ୍ ଟି ଟ୍ରକ୍ କୁ ଧକ୍କା ଦେଇଥିଲା। ଘଟଣା ସ୍ଥଳରେ ଝାରବେଡା ଗ୍ରାମର ବାପୁନ୍ ଖଣ୍ଡେଇଙ୍କ ମୃତ୍ୟୁ ଘଟିଥିବା ବେଳେ ଝୁଲୁ ନାଏକ ଓ ସୁଦର ମୁଣ୍ଡାଙ୍କ ପୁଅ ଗୁରୁତର ହୋଇ କେନ୍ଦୁଝର ଚିକିତ୍ସାଳୟକୁ ସ୍ଥାନାନ୍ତର ହୋଇଛନ୍ତି। ମୃତକ ବାପୁନ୍ ଖଣ୍ଡେଇ ଗତ ବର୍ଷ ବିବାହ କରିଥିଲେ ଓ ତାଙ୍କ ପତ୍ନୀ ଗର୍ଭବତୀ ଥାଇ ଆଜି ବାପ ଘରେ ସାବିତ୍ରୀ ବ୍ରତ ପାଳିଥିଲେ। ପଣ୍ଡାପଡ଼ା ପୁଲିସ ଘଟଣାର ତଦନ୍ତ କରୁଛି।
