ତେଲକୋଇ : ତେଲକୋଇ ଥାନା ଅନ୍ତର୍ଗତ ଖୁଣ୍ଟାପଡା ପଞ୍ଚାୟତ ଅଧିନସ୍ଥ ଖୁଣ୍ଟାପଡା ମୁଣ୍ଡାସାହି ଛକ ଏବଂ ଛାମୁଣ୍ଡା ପଞ୍ଚାୟତ ମୁଖ୍ୟାଳୟର ହାଟପଦା ଛକ ଠାରେ ପୃଥକ ପୃଥକ ଦୁଇଟି ଦୁର୍ଘଟଣା ଘଟି ୪ଜଣ ଗୁରୁତର ହୋଇଛନ୍ତି । ସେଥିମଧ୍ୟରୁ ୩ଜଣଙ୍କ ଅବସ୍ଥା ସଙ୍କଟାପର୍ଣ୍ଣ ରହିଥିବାରୁ କେନ୍ଦୁଝର ଜିଲ୍ଲା ମୁଖ୍ୟ ସ୍ବାସ୍ଥ୍ୟକେନ୍ଦ୍ରକୁ ସ୍ଥାନାନ୍ତରିତ କରାଯାଇଛି।
ଖୁଣ୍ଟାପଡା ମୁଣ୍ଡାସାହି ନିକଟରେ ଖୁଣ୍ଟାପଡା ପଞ୍ଚାୟତ କୁଲାଡେରା ଗ୍ରାମର ବିଷ୍ଣୁ ନାଏକ(୨୧) ଓ ବିଭିଷଣ ମୁଣ୍ଡା(୨୧) ବାଇକ ଯୋଗେ ତେଲକୋଇ ଆଡୁ ନିଜ ଘରକୁ ଫେରୁଥିବା ବେଳେ ଭାରସାମ୍ୟ ହରାଇ ସାଇକେଲ ଯୋଗେ ସଉଦା ପାଇଁ ଯାଉଥିବା ଖୁଣ୍ଟାପଡା ମୁଣ୍ଡାସାହିର ପିଣ୍ଟୁ ପେଣ୍ଠେଇ (୨୦)ଙ୍କୁ ସାମ୍ନାରୁ ଧକ୍କା ଦେଇଥିଲା । ଘଟଣାସ୍ଥଳରେ ମୋଟରସାଇକେଲ ଆରୋହୀ ଏବଂ ସାଇକେଲ ଆରୋହୀ ଗୁରୁତର ହୋଇ ପଡିରହିଥିବା ବେଳେ ଖବର ପାଇ ୧୦୮ରୋଗୀଯାନ ଯୋଗେ ତେଲକୋଇ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ପହଞ୍ଚାଇଥିଲେ । ଅବସ୍ଥା ଗୁରୁତର ଥିବାରୁ ବିଷ୍ଣୁ ଓ ପିଣ୍ଟୁ ଙ୍କୁ ଜିଲ୍ଲା ମୁଖ୍ୟ ସ୍ବାସ୍ଥ୍ୟକେନ୍ଦ୍ରକୁ ସ୍ଥାନାନ୍ତରିତ କରାଯାଇଛି। ସେହିପରି ଛାମୁଣ୍ଡା ପଞ୍ଚାୟତ ମୁଖ୍ୟାଳୟର ହାଟ ପଡିଆ ନିକଟରେ ଅଟୋ ବାଇକ ମୁହାଁମୁହିଁ ହେବା ସହ ବାଇକ ଚାଳକଙ୍କ ମୁଣ୍ଡ ଉପରେ ଅଟୋ ଚଢିଯିବା ଫଳରେ ବାଇକ ଆରୋହୀ ଗୁରୁତର ହୋଇଛନ୍ତି । ବାଇକ ଆରୋହୀ ଜଣକ ହେଲେ ପଶ୍ଚିମବଙ୍ଗ ମୁର୍ଶିଦାବାଦ ଜିଲ୍ଲାର ଫେରୀ ବ୍ୟବସାୟୀ ରଫିକ୍ଉଲ୍ଲ ମଣ୍ଡଲ (୪୨) । ରଫିକ ଫେରୀ ବ୍ୟବସାୟ ସାରି ଭଡାଘର ତେଲକୋଇକୁ ଆସୁଥିବା ବେଳେ ତେଲକୋଇ ପଟୁ ଜଗମୋହନପୁର ଆଡେ ଯାଉଥିବା ଅଟୋ ସହିତ ଦୁର୍ଘଟଣା ଘଟିଛି । ଘଟଣା ଘଟାଇ ଅଟୋଟି ଫେରାର ହୋଇଯାଇଥିବା ଜଣାପଡିଛି। ଗୁରୁତର ଫେରୀ ବ୍ୟବସାୟୀଙ୍କୁ ସଙ୍ଗେ ସଙ୍ଗେ ତେଲକୋଇ ସ୍ୱାସ୍ଥ୍ୟକେନ୍ଦ୍ର ରେ ପହଞ୍ଚାଇଥିଲେ ହେଁ ଅବସ୍ଥା ସଙ୍କଟାପର୍ଣ୍ଣ ଥିବାରୁ ଜିଲ୍ଲା ମୁଖ୍ୟ ସ୍ବାସ୍ଥ୍ୟକେନ୍ଦ୍ରକୁ ସ୍ଥାନାନ୍ତରିତ କରାଯାଇଛି।
Comments are closed.