ତୁମୁଡିବନ୍ଧ: ଲଘୁଚାପ ଜନିତ ଲଗାଣ ବର୍ଷାରେ କନ୍ଧମାଳ ଓ କଳାହାଣ୍ଡି ଜିଲା ବାହ୍ୟ ଜଗତରୁ ବିଚ୍ଛିନ୍ନ ହୋଇଯାଇଛି । କନ୍ଧମାଳ ଜିଲାର ତୁମୁଡିବନ୍ଧ ବ୍ଲକର ସିର୍ଲା, ଲଙ୍କାଗଡ଼, ଭଣ୍ଡାରଙ୍ଗୀ, ଝିରିପାଣି ଗ୍ରାମ ଓ କୋଟଗଡ ବ୍ଲକର ପାରିଗଡ଼ ପଞ୍ଚାୟତକୁ ଗମନାଗମନ ହୋଇପାରୁନାହିଁ। ମଙ୍ଗଳବାର ଠାରୁ ଆରମ୍ଭ ହୋଇଥିବା ପ୍ରବଳ ବର୍ଷା ଫଳରେ ତୁମୁଡିବନ୍ଧ ଅଞ୍ଚଳ ଦେଇ ପ୍ରବାହିତ ହେଉଥିବା ଚାଉଳଧୁଆ, ଉତ୍ତେଇନଦୀ, ରାଉଳ ନଦୀରେ ଜଳସ୍ତର ବଢ଼ିବାରେ ଲାଗିଛି । ତଳିଆ ଅଞ୍ଚଳରେ ରହୁଥିବା ଲୋକଙ୍କ ଘରେ ବର୍ଷା ପାଣି ପସି ୪୦ଟି ମାଟିଘରର କାନ୍ଥ ମଧ୍ୟ ପଡିଯାଇଛି । ପ୍ରଶାସନ ତରଫରୁ କ୍ଷୟକ୍ଷତି ଆକଳନ କରାଯାଇ ଖୁବଶୀଘ୍ର ସହାୟତା ଯୋଗାଇ ଦିଆଯିବ ବୋଲି ତୁମୁଡିବନ୍ଧ ତହସିଲଦାର ଶ୍ରୀ ନାୟକ କହିଛନ୍ତି ।
ସେପଟେ ରାୟପୁର–ଗୋପାଳପୁର ୫୯ନମ୍ବର ଜାତୀୟ ରାଜପଥ ଅନ୍ତର୍ଗତ ମଣ୍ଡଳପଦର ନିକଟରେ ଏକ ଅସ୍ଥାୟୀ ଡାଇଭର୍ଶନ ଭାସିଯାଇଥିବା ଜଣାପଡ଼ିଛି । ଏହା ଫଳରେ ୨ଦିନ ହେଲା କନ୍ଧମାଳ ଜିଲ୍ଲା ସହ ପଡୋଶୀ କଳାହାଣ୍ଡି ଜିଲ୍ଲା ସମେତ ଭବାନୀପାଟଣା–କଟକ, ଧର୍ମଗଡ଼–ବ୍ରହ୍ମପୁର, ବଲାଙ୍ଗୀର–ବାଲିଗୁଡା, ଉମରକୋଟ–ଭୁବନେଶ୍ୱରକୁ ଗାଡି ଚଳାଚଳ ବଧାପ୍ରାପ୍ତ ହୋଇଛି । ରାସ୍ତାରେ ବର୍ଷା ଜଳ ଜମି ରହିଥିବା ବେଳେ ଉଭୟ ପାର୍ଶ୍ୱରେ ଯାନବାହାନ ଅଟକି ରହିଛି । ଏହା ସହ ପଡୋଶୀ ରାଜ୍ୟ ଛତିଶଗଡ଼କୁ ମଧ୍ୟ ଗାଡି ଚାଳଚଳ ସମ୍ପୂର୍ଣ୍ଣ ଭାବେ ବନ୍ଦ ହୋଇଯାଇଛି।
Comments are closed.