ନୂଆଦିଲ୍ଲୀ : ଜବାହାରଲାଲ ନେହେରୁ ବିଶ୍ବବିଦ୍ୟାଳୟ (ଜେଏନୟୁ)ରେ ରୁଷ୍ ଭାଷା ଅଧ୍ୟୟନ ଲାଗି ହୋଇଥିବା ପ୍ରବେଶିକା ପରୀକ୍ଷାରେ ଜଣେ ସିକ୍ୟୁରିଟି ଗାର୍ଡ ସଫଳ ହୋଇଛନ୍ତି। ରାଜମାଲ ମୀନା (୩୪) ସିକ୍ୟୁରିଟି ଗାର୍ଡ ଜଣଙ୍କ ଜେଏନୟୁରେ କାର୍ଯ୍ୟ କରୁଛନ୍ତି। ପ୍ରବେଶିକା ପରୀକ୍ଷା ସଫଳତା ଦ୍ବାରା ମୀନା ଜେଏନୟୁର ରୁଷ୍ ଭାଷା ସ୍ନାତକ (ଅନର୍ସ) ଡିଗ୍ରୀ ପାଠ୍ୟକ୍ରମରେ ନାମ ଲେଖାଇବାକୁ ଯୋଗ୍ୟ ହୋଇଛନ୍ତି। ଏଥିପାଇଁ ତାଙ୍କୁ ଜେଏନୟୁର ଶିକ୍ଷକ ଓ ଛାତ୍ର ଅଭିନନ୍ଦନ ଜଣାଇଛନ୍ତି। ରାଜସ୍ଥାନ କରୌଲି ଜିଲାର ବାସିନ୍ଦା ମୀନା ୨୦୧୪ରେ ଜେଏନୟୁରେ ସିକ୍ୟୁରିଟି ଗାର୍ଡ ଭାବେ କାର୍ଯ୍ୟ ଆରମ୍ଭ କରିଥିଲେ। କାର୍ଯ୍ୟ ଆରମ୍ଭ ଦିନରୁ ହିଁ ଉକ୍ତ ବିଶ୍ବବିଦ୍ୟାଳୟରେ ପାଠ ପଢିବାକୁ ସେ ମନସ୍ଥ କରିଥିଲେ। ଏଥିପାଇଁ ସେ ନିଜର ପ୍ରୟାସ ଆରମ୍ଭ କରିଥିଲେ। ସ୍କୁଲ ପରେ ଆର୍ଥିକ ଅସୁବିଧା କାରଣରୁ କଲେଜରେ ପାଠ ପଢିବାର ସୁଯୋଗ ତାଙ୍କୁ ମିଳି ନଥିଲା। ତେଣୁ କାମ କରି ସେ ପରିବାରକୁ ଆର୍ଥିକ ସହଯୋଗ କରିଆସୁଥିଲେ। ଗତବର୍ଷ ସେ ରାଜସ୍ଥାନ ବିଶ୍ବବିଦ୍ୟାଳୟର ଦୂର ନିରନ୍ତର ପାଠ୍ୟକ୍ରମ ମାଧ୍ୟମରେ ସ୍ନାତକ ଡିଗ୍ରୀ ହାସଲ କରିଥିଲେ। ନାମ ଲେଖାଇବା ପରେ ସେ ରାତିରେ କାମ କରିବେ ଓ ଦିନରେ କ୍ଲାସ କରିବେ ବୋଲି ମୀନା କହିଛନ୍ତି। ମୁଖ୍ୟ ସିକ୍ୟୁରିଟି ଅଧିକାରୀ କହିଛନ୍ତି ଯେ ମୀନାଙ୍କ ପାଇଁ ଆମେ ଗର୍ବିତ। ଦିନରେ ନିୟମିତ କ୍ଲାସ କରି ରାତିରେ କାମ କରିବା କଷ୍ଟକର। ତଥାପି ଆମେ ମୀନାଙ୍କୁ ସାହାଯ୍ୟ କରିବା ଲାଗି ଚେଷ୍ଟା କରିବୁ ବୋଲି ଉକ୍ତ ଅଧିକାରୀ କହିଛନ୍ତି।
