ଉତ୍ତର ପୂର୍ବାଞ୍ଚଳରେ ୧୩ହଜାର କୋଟି ଟଙ୍କା ନିବେଶ କରିବ ଜାପାନ

ନୂଆଦିଲ୍ଲୀ : ଜାପାନ ସରକାର ଭାରତର ଉତ୍ତର-ପୂର୍ବାଞ୍ଚଳରେ ବିଭିନ୍ନ ରାଜ୍ୟରେ ବର୍ତ୍ତମାନ ଜାରି ରହିଥିବା କେତେକ ନୂଆ ପ୍ରକଳ୍ପରେ ୨୦୫.୭୮୪ ବିଲିୟନ ୟେନ ଅର୍ଥାତ ପ୍ରାୟ ୧୩ ହଜାର କୋଟି ଟଙ୍କା ନିବେଶ କରିବା ଲାଗି ନିଷ୍ପତି ନେଇଛନ୍ତି। ଉତର-ପୂର୍ବାଞ୍ଚଳ ରାଷ୍ଟ୍ରମନ୍ତ୍ରୀ ଡ. ଜିତେନ୍ଦ୍ର ସିଂଙ୍କ ସହିତ ଜାପାନର ରାଷ୍ଟ୍ରଦୂତ ଶ୍ରୀ କେଞ୍ଜି ହୀରାମାତ୍‍ସୁଙ୍କ ନେତୃତ୍ୱରେ ଏକ ଜାପାନୀ ପ୍ରତିନିଧି ଦଳ ବୁଧବାର ନୂଆଦିଲ୍ଲୀରେ ଏକ ବୈଠକରେ ଆଲୋଚନା
କରିବା ପରେ ଏହି ସୂଚନା ଦିଆଯାଇଛି। ଯେଉଁ ଗୁରୁତ୍ୱପୂର୍ଣ୍ଣ ପ୍ରକଳ୍ପରେ ଜାପାନ ସହଯୋଗ କରିବ, ସେଥି ମଧ୍ୟରେ ଗୌହାଟୀରେ ଜଳଯୋଗାଣ ପ୍ରକଳ୍ପ
ଏବଂ ଗୌହାଟୀ ଜଳ ନିଷ୍କାସନ ପ୍ରକଳ୍ପ, ଆସାମ ଏବଂ ମେଘାଳୟରେ ବ୍ୟାପ୍ତ ଉତର-ପୂର୍ବାଂଚଳ ସଡ଼କ ନେଟୱାର୍କ ସଂଯୋଗ ଉନ୍ନତିକରଣ ପ୍ରକଳ୍ପ, ସିକ୍କିମରେ ଜୈବ-ବିବିଧତା ସଂରକ୍ଷଣ ଏବଂ ବନ-ପରିଚାଳନା ପ୍ରକଳ୍ପ, ତ୍ରିପୁରାରେ ନିରନ୍ତର ବନ ପରିଚାଳନା ପ୍ରକଳ୍ପ, ମିଜୋରାମରେ ନିରନ୍ତର କୃଷି ଏବଂ ଜଳସେଚନ ଲାଗି ବୈଷୟିକ ସହଯୋଗ ପ୍ରକଳ୍ପ, ନାଗାଲାଣ୍ଡରେ ବନ ପରିଚାଳନା ପ୍ରକଳ୍ପ ଆଦି ସାମିଲ ରହିଛି। ବିଗତ ତିନିରୁ ଚାରି ବର୍ଷ ଧରି ଉତର ପୂର୍ବାଞ୍ଚଳ କ୍ଷେତ୍ରର ବିକାଶ ଏବଂ ପରିବର୍ତନରେ ଜାପାନର ଯୋଗଦାନକୁ ଡ. ଜିତେନ୍ଦ୍ର ସିଂ ପ୍ରଶଂସା କରିଥିଲେ। ସେ କହିଥିଲେ ଯେ ଆଗାମୀ ଦିନରେ ସହଯୋଗର କେତେକ ନୂଆ କ୍ଷେତ୍ର ସନ୍ଧାନ କରାଯିବ, ଯେଉଁଥିରେ ବାଉଁଶ ସହ ଜଡ଼ିତ କ୍ଷେତ୍ରରେ ସହଯୋଗ ମିଳିପାରିବ। ପ୍ରଧାନମନ୍ତ୍ରୀ ଶ୍ରୀ
ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ ସରକାର ବ୍ରିଟିଶ ସରକାର ଅମଳରୁ ଚାଲି ଆସୁଥିବା ୧୯୧୯ର ଭାରତୀୟ ଜଙ୍ଗଲ ଆଇନରେ ସଂଶୋଧନ କରିଛନ୍ତି ଯଦ୍ଦ୍ୱାରା ଦେଶରେ ଉତ୍ପାଦିତ ବାଉଁଶକୁ ଏହି ଆଇନ ଠାରୁ ବାହାରେ ରଖାଯାଇଛି।