ନୂଆଦିଲ୍ଲୀ: ଜବାହାରଲାଲ ନେହେରୁ ବିଶ୍ୱବିଦ୍ୟାଳୟ ଛାତ୍ର ସଙ୍ଘର ପୂର୍ବତନ ଅଧ୍ୟକ୍ଷ ଚନ୍ଦ୍ରଶେଖର ହତ୍ୟାକାଣ୍ଡ ମାମଲାରେ ପାଟଣା ହାଇକୋର୍ଟ ୪ଜଣ ହତ୍ୟାକାରୀ ପାଇଥିବା ଆଜୀବନ କାରାଦଣ୍ଡ ଅପରିବର୍ତ୍ତିତ ରଖିଛନ୍ତି। ଦୁଇ ଥର ଜେଏନୟୁ ଛାତ୍ରସଂଘର ଅଧ୍ୟକ୍ଷ ଥିବା ଚନ୍ଦ୍ରଶେଖରଙ୍କ ୧୯୯୭ ମାର୍ଚ୍ଚ ୩୧ରେ ବିହାରର ସିଵାନ ସହରରେ ଏକ ସଭାରେ ଭାଷଣ ଦେଉଥିବା ବେଳେ ତାଙ୍କୁ ହତ୍ୟା କରାଯାଇଥିଲା। ସେଥିରେ ସିପିଆଇ (ଏମଏଲ) ଜିଲ୍ଲା କମିଟି ସଦସ୍ୟ ଶ୍ୟାମ ନାରାୟଣ ଯାଦବଙ୍କୁ ମଧ୍ୟ ହତ୍ୟା କରାଯାଇଥିଲା
ଏହି ମାମଲାରେ ସିବିଆଇ କୋର୍ଟ ୪ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଥିଲେ। ସେହି ଅଭିଯୁକ୍ତମାନେ ହେଉଛନ୍ତି ଧ୍ରୁବ କୁମାର ଜୟସ୍ବାଲ, ଇଲିଆଶ ୱାରିଷ, ଶେଖ ମୁନ୍ନା ଓ ରୁସ୍ତମ ଖାଁ। ପାଟଣା ହାଇକୋର୍ଟ ଏହି ମାମଲାରେ ୫୬ ପୃଷ୍ଠା ସମ୍ବଳିତ ନିଜ ରାୟରେ ସିବିଆଇ କୋର୍ଟର ନିଷ୍ପତ୍ତି ଉପରେ ହସ୍ତକ୍ଷେପ କରିବେ ନାହିଁ ବୋଲି କହିଛନ୍ତି। ୨୦୧୨ ନଭେମ୍ବରରେ ସିବିଆଇ କୋର୍ଟ ସମ୍ପୃକ୍ତ ୪ଜଣକୁ ଆଜୀବନ କାରାଦଣ୍ଡ ସହ ଜୋରିମାନା କରିଥିଲେ।
