ଅନୁଗୁଳ: ଯାତ୍ରା କାର୍ଯ୍ୟକ୍ରମରେ ଯୋଗ ଦେବାକୁ ଯାଇଥିବା ବେଳେ ଅଭିନେତ୍ରୀ ଉଷସୀ ମିଶ୍ରଙ୍କୁ ଅସଦାଚରଣ କରାଯାଇଥିବା ଅଭିଯୋଗ ହୋଇଛି। କଣିହାଁ ନିକଟସ୍ଥ ଡେରଙ୍ଗଠାରେ ଘଟିଥିବା ଏହି ଘଟଣା ପାଇଁ ଦାୟୀ କରି ଇନ୍ଦ୍ରମଣି ସାହୁ ନାମକ ଜଣେ ବ୍ୟକ୍ତି ଓ ତାଙ୍କ ଦୁଇ ପୁଅଙ୍କ ବିରୋଧରେ ଉଷସୀ ଥାନାରେ ଏତଲା ଦେଇଛନ୍ତି। ତାଙ୍କୁ ଟଣାଓଟରା କରାଯାଇଥିବା ଓ ଅଶ୍ଲୀଳ ଭାଷାରେ ଗାଳିଗୁଲଜ କରାଯିବା ସହିତ ଗାଡ଼ି ଭଙ୍ଗାରୁଜା ହୋଇଥିବା ସେ ଏତଲାରେ ଦର୍ଶାଇଛନ୍ତି। ଏ ସଂକ୍ରାନ୍ତରେ କଣିହା ଥାନା ଭାରପ୍ରାପ୍ତ ଅଧିକାରୀ ସୁକାନ୍ତି କେରକେଟା କହିଛନ୍ତି ଉଷସୀ ଗାଡ଼ିରୁ ଓହ୍ଲାଇ ଯାତ୍ରା ମଞ୍ଚ ନିକଟକୁ ଯାଉଥିବା ବେଳେ ଲୋକେ ତାଙ୍କୁ ଦେଖିବାକୁ ଭିଡ଼ ଜମିଥିଲା। ଠେଲାପେଲା ଭିତରେ କେହି ଜଣେ ଉଷସୀଙ୍କୁ ଧକ୍କା ଦେଇଥିଲା। ଏଥିରେ ଉତ୍କ୍ଷିପ୍ତ ହୋଇ ଉଷସୀ ଜଣକୁ ଚାପୁଡ଼ା ମାରିଥିଲେ। ଏହାପରେ ଉତ୍ତେଜନା ଦେଖାଦେଇଥିଲା। ଅଭିଯୋଗ ଆଧାରରେ ତଦନ୍ତ ଆରମ୍ଭ ହୋଇଥିôବା ଡିଆଇଜି ନରସିଂହ ଭୋଳ ସୂଚନା ଦେଇଛନ୍ତି। ଘଟଣା ସମ୍ପର୍କରେ ଉଷସୀ ସୋସିଆଲ୍ ମିଡିଆରେ ଉଲ୍ଲେଖ କରି ନିଜ କ୍ଷୋଭ ପ୍ରକାଶ କରିଛନ୍ତି। ଏକ ନିର୍ଦ୍ଦିଷ୍ଟ ଯାତ୍ରା ପାର୍ଟିର ନାମ ନେଇ ସେ କହିଛନ୍ତ ଯେ ପରିଚାଳନାଗତ ଅଭାବ ଓ ପୁଲିସ ଉଦାସୀନତା ଯୋଗୁଁ ଏଭଳି ଘଟଣା ଘଟିଲା। ଯଦି ତାଙ୍କ ଭଳି ଜଣେ ସେଲିବ୍ରିଟି ଅସଦାଚରଣର ଶିକାର ହେଲେ ସେହି କ୍ଷେତ୍ରରେ ଜଣେ ସାଧାରଣ ଯୁବତୀ ବା ମହିଳାଙ୍କ ସ୍ଥିତି କଣ ହୋଇପାରେ ଏଥିରୁ ଅନୁମେୟ ବୋଲି ସେ ଉଲ୍ଲେଖ କରିଛନ୍ତି।
