ଚେନ୍ନାଇ: ୧୬ରୁ ୧୮ ବର୍ଷ ବୟସର କିଶୋର-କିଶୋରୀଙ୍କ ମଧ୍ୟରେ ସହମତି ଭିତ୍ତିରେ ସମ୍ପର୍କ ଯୌନ ଅପରାଧରୁ ଶିଶୁଙ୍କ ସୁରକ୍ଷା(ପୋକ୍ସୋ) ଆଇନ ପରିସର ମଧ୍ୟରେ ଆସିବା ଅନୁଚିତ ବୋଲି ମାଡ୍ରାସ ହାଇକୋର୍ଟ କହିଛନ୍ତି। ବର୍ତ୍ତମାନ ୧୮ ବର୍ଷର କମ୍ ବୟସର ପିଲାଙ୍କୁ ନାବାଳକ ବୋଲି କୁହାଯାଉଛି। କିନ୍ତୁ ଯେଉଁମାନଙ୍କର ବୟସ ୧୬ ବର୍ଷରୁ କମ୍ ସେମାନଙ୍କୁ ନାବାଳକ ଭାବେ ବିବେଚନା କରାଯିବା ଉଚିତ ବୋଲି ମାଡ୍ରାସ ହାଇକୋର୍ଟ କହିଛନ୍ତି।
୧୬ ବର୍ଷ ବୟସ ପରେ ସହମତି ଭିତ୍ତିରେ ଯୌନ ସମ୍ପର୍କ, ଶାରିରୀକ ସମ୍ପର୍କ କିମ୍ବା ଏ ସମ୍ପର୍କିତ କାର୍ଯ୍ୟକୁ ପୋକ୍ସୋ ଆଇନରେ ରହିଥିବା କଠିନ ପ୍ରାବଧାନରୁ ବାଦ୍ ଦିଆଯାଇପାରିବ ଏବଂ ଏହାକୁ କୋହଳ ପ୍ରାବଧାନ ସହିତ ଯୌନ ଉତ୍ପୀଡ଼ନ ମାମଲା ଆଧାରରେ ବିଚାର କରାଯାଇ ପାରିବ। ଯୌନ ଉତ୍ପୀଡ଼ନ ଏବଂ କିଶୋରଙ୍କ ସମ୍ପର୍କ ମଧ୍ୟରେ ରହିଥିବା ପାର୍ଥକ୍ୟକୁ ଦର୍ଶାଇ ମାଡ୍ରାସ ହାଇକୋର୍ଟ ବିଚାରପତି ଭି. ପାର୍ଥିବନ ଏହା କହିଛନ୍ତି।
ସୂଚନା ମୁତାବକ, ତାମିଲନାଡୁର ନାମକ୍କଲସ୍ଥିତ ଫାଷ୍ଟଟ୍ରାକ ମହିଳା କୋର୍ଟ ୨୦୧୮ ଜୁନରେ ଜଣେ ନାବାଳକଙ୍କୁ ପୋକ୍ସୋ ଆଇନ ଆଧାରରେ ଦୋଷୀ ସାବ୍ୟସ୍ତ କରି ୧୦ବର୍ଷ କାରାଦଣ୍ଡାଦେଶ ଶୁଣାଇବା ସହ ୩ ହଜାର ଟଙ୍କା ଜରିମାନା କରିଥିଲେ। ଏହାକୁ ଚ୍ୟାଲେଞ୍ଜ କରି ଅଭିଯୁକ୍ତ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ। ହାଇକୋର୍ଟ ଆବେଦନକାରୀଙ୍କ ପିଟିଶନର ଶୁଣାଣି କରିବା ସମୟରେ ଉପରୋକ୍ତ ମନ୍ତବ୍ୟ ଦେଇଛନ୍ତି।
