ମାଣ୍ଡାଲୟ (ମିଆଁମାର) : ବୁଧବାର ଏଠାରେ ମହିଳା ଫୁଟ୍ବଲର ଅଲିମ୍ପିକ୍ ଯୋଗ୍ୟତା ପର୍ଯ୍ୟାୟର ୨ ରାଉଣ୍ଡ ଆରମ୍ଭ ହୋଇଛି। ଏହାର ପ୍ରଥମ ମ୍ୟାଚ୍ରେ ବିଜୟ ସହ ଅଭିଯାନ ଆରମ୍ଭ କରିଛି ଭାରତ। ଇଣ୍ଡୋନେସିଆକୁ ୨-୦ ଗୋଲ୍ରେ ଭାରତ ପରାସ୍ତ କରିଛି। ଭାରତ ପାଇଁ ଅଭିଜ୍ଞ ଷ୍ଟ୍ରାଇକର ଡାଙ୍ଗ୍ମେଇ ଗ୍ରେସ୍ ଉଭୟ ଗୋଲ୍ ଦେଇଥିଲେ।
୨୦୨୦ ଟୋକିଓ ଅଲିମ୍ପିକ୍ସ ଲାଗି ଖେଳା ଯାଉଥିବା ଯୋଗ୍ୟତା ପର୍ଯ୍ୟାୟର ଏହା ୨ୟ ରାଉଣ୍ଡ। ନିକଟରେ କ୍ରମାଗତ ୫ମ ଥର ପାଇଁ ସାଫ୍ ଟୁର୍ଣ୍ଣାମେଣ୍ଟରେ ଚମ୍ପିଆନ୍ ହୋଇଥିବା ଭାରତୀୟ ଦଳ ଉତ୍ସାହର ସହ ଇଣ୍ଡୋନେସିଆ ବିପକ୍ଷରେ ଖେଳିଥିଲା। ଆରମ୍ଭରୁ ଭାରତୀୟ ଦଳ ପ୍ରାଧାନ୍ୟ ବିସ୍ତାର କରିଥିଲା। ଉଭୟ ପାର୍ଶ୍ବରେ ସଞ୍ଜୁ ଓ ରତ୍ନବାଳା ଚମତ୍କାର ପ୍ରଦର୍ଶନ କରି ଇଣ୍ଡୋନେସିଆକୁ ଚାପରେ ପକାଇଥିଲେ। ୨୪ ଓ ୨୬ ମିନିଟରେ ଭାରତ ୨ଟି ଗୋଲ୍ଦେବାର ସୁଯୋଗ ହାତଛଡ଼ା କରିବା ପରେ ୨୭ ମିନିଟରେ ଭାରତ ପ୍ରଥମ ଗୋଲ୍ ଦେଇଥିଲା। ସନ୍ଧ୍ୟାଙ୍କ ପାସ୍ରୁ ଇଣ୍ଡୋନେସିଆ ଗୋଲ୍କୁ ସଞ୍ଜୁ ସଟ୍ ମାରିଥିଲେ ହେଁ ଗୋଲ୍ରକ୍ଷକ ଏହାକୁ ରୋକି ଦେଇଥିଲେ। ତେବେ ଗୋଲ୍ ସମ୍ମୁଖେର ଥିବା ଭାରତର ଡାଙ୍ଗ୍ମେଇ ଗ୍ରେସ୍ ବଲ୍ ପାଇ ଏହାକୁ ଗୋଲ୍ ମଧ୍ୟକୁ ପଠାଇ ଦେଇଥିଲେ। ପ୍ରଥମାର୍ଦ୍ଧରେ ୧-୦ ଗୋଲ୍ରେ ଆଗୁଆ ଥିବା ଭାରତ ଦ୍ବିତୀୟାର୍ଦ୍ଧରେ ମ୍ୟାଚ୍କୁ ନିୟନ୍ତ୍ରଣରେ ରଖି ପାରିଥିଲା। ୫୬ ମିନିଟରେ ଭାରତର ରତ୍ନବାଳା ଦେବୀ ଓ ୩ ମିନିଟ ପରେ ଡାଙ୍ଗ୍ମେଇ ଗ୍ରେସ୍ ଗୋଲ୍ ଦେବାରେ ବିଫଳ ହୋଇଥିଲେ। ୬୭ ମିନିଟରେ ସୁମିତ୍ରା କାମରାଜଙ୍କ ସଟ୍କୁ ଇଣ୍ଡୋନେସିଆ ଗୋଲ୍ରକ୍ଷକ ରୋକି ଦେଇଥିବା ବେଳେ ଏଥରୁ ବଲ୍ ପାଇ ଡାଙ୍ଗ୍ମେଇ ଗ୍ରେସ୍ ଦଳ ପାଇଁ ତଥା ବ୍ୟକ୍ତିଗତ ୨ୟ ଗୋଲ୍ ସ୍କୋର କରିଥିଲେ। ୬ରେ ନେପାଳ ବିପକ୍ଷରେ ଭାରତ ୨ୟ ଲିଗ୍ ମ୍ୟାଚ୍ ଖେଳିବ।
ଇଣ୍ଡୋନେସିଆକୁ ୨-୦ରେ ହରାଇଲା ଭାରତ
Popular Categories
Previous article
Next article