ଇସଲାମାବାଦ : ପାକିସ୍ତାନର ପୂର୍ବତନ ସାମରିକ ଶାସକ ଜେନେରାଲ ପରଭେଜ ମୁସରଫ ଗୁରୁତର ଅସୁସ୍ଥ ଅବସ୍ଥାରେ ଦୁବାଇର ଏକ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ସେ ଏକ ବିରଳ ବ୍ୟାଧି ‘ଆମିଲୋଇଡୋସିସ୍’ରେ ପୀଡ଼ିତ ଥିବା ଜଣାପଡ଼ିଛି। ଏଥିରେ ତାଙ୍କର ସ୍ନାୟୁସବୁ ଦୁର୍ବଳ ହୋଇପଡ଼ୁଛି। ପୂର୍ବରୁ ଡାକ୍ତର ତାଙ୍କୁ ପୂର୍ଣ୍ଣ ବିଶ୍ରାମ ପାଇଁ ପରାମର୍ଶ ଦେଇଥିଲେ ବୋଲି ମୁସରଫଙ୍କ ‘ଅଲ୍ ପାକିସ୍ତାନ ମୁସଲିମ୍ ଲିଗ୍’ ଦଳର ମହାସଚିବ ମେହରିନ୍ ଆଦାମ ମାଲିକ କହିଛନ୍ତି। ଗତ ବର୍ଷ ସେ ଏହି ବ୍ୟାଧିରେ ପଡ଼ିଥିବା ଜଣାପଡ଼ିବା ପରେ ଲଣ୍ଡନରେ ଚିକିତ୍ସିତ ହେଉଥିଲେ। ଏଥିଯୋଗୁଁ ସେ ଛିଡ଼ା ହେବା ଓ ଚାଲିବା କଷ୍ଟକର ହୋଇପଡ଼ିଛି। ଶନିବାର ରାତିରେ ସେ ହଠାତ୍ ଗୁରୁତର ହୋଇପଡ଼ିବାରୁ ତାଙ୍କୁ ଡାକ୍ତରଖାନା ନିଆଯାଇଥିଲା। ତାଙ୍କ ଶରୀରର ବିଭିନ୍ନ ଗୁରୁତ୍ବପୂର୍ଣ୍ଣ ଅଙ୍ଗ ପ୍ରଭାବିତ ହୋଇଥିବା କୁହାଯାଉଛି। ୨୦୧୬ ମାର୍ଚ୍ଚରୁ ଦୁବାଇରେ ନିର୍ବାସିତ ଜୀବନ ବିତାଉଥିବା ୭୫ବର୍ଷୀୟ ମୁସରଫଙ୍କ ବିରୋଧରେ ପାକିସ୍ତାନରେ ଏକାଧିକ ମାମଲା ବିଚାରାଧୀନ ରହିଛି।
