ସମାଜ ନ୍ୟୁଜ ଡେସ୍କ: ବଙ୍ଗୋପସାଗରେ ସୃଷ୍ଟି ହୋଇଥିବା ସାମୁଦ୍ରିକ ବାତ୍ୟା ‘ମନ୍ଥା’ର ମୁକାବିଲା ପାଇଁ ବାଲେଶ୍ବର ଜିଲା ପ୍ରଶାସନ ପକ୍ଷରୁ ପ୍ରସ୍ତୁତି ଜୋରଦାର ହୋଇଛି। ପାଣିପାଗ ବିଭାଗ ପୂର୍ବାନୁମାନ ଓ ରାଜ୍ୟ ସ୍ବତନ୍ତ୍ର ରିଲିଫ ଆୟୁକ୍ତଙ୍କ ନିେର୍ଦ୍ଦଶାନୁସାରେ ଜିଲା ପ୍ରଶାସନ ପକ୍ଷରୁ ବିଭିନ୍ନ ପଦକ୍ଷେପ ନିଆଯାଇଛି । ସମ୍ଭାବ୍ୟ ବାତ୍ୟା ଓ ବର୍ଷାକୁ ଦୃଷ୍ଟି ଦେଇ ସାଧାରଣ ଲୋକଳଙ୍କୁ ସୁରକ୍ଷିତ ରଖିବା ଦିଗରେ ଯୁଦ୍ଧକାଳୀନ ଭିତ୍ତିରେ ପ୍ରସ୍ତୁତି ଚାଲିଥିବା ଜିଲା ଜରୁରୀକାଳୀନ ଅଧିକାରୀ ସାଇକ୍ରିଷ୍ଣା ଜେନା ସୂଚନା ଦେଇଛନ୍ତି ।
ସ୍ଥିତି ସାମାନ୍ୟ ନହେବା ପର୍ଯ୍ୟନ୍ତ ସମସ୍ତ ସରକାରୀ ଅଧିକାରୀ ଓ କର୍ମଚାରୀଙ୍କ ଛୁଟି ବାତିଲ କରାଯାଇଛି । ବାତ୍ୟା ଆଶ୍ରୟ ସ୍ଥଳ ଓ ଆନୁଷଙ୍ଗିକ ସାମଗ୍ରୀକୁ ପ୍ରସ୍ତୁତ ରଖିବା, ବିଶେଷକରି ଡିଜି ସେଟ୍ଗୁଡ଼ିକର କାର୍ଯ୍ୟକ୍ଷମ ରଖିବା, ବିଭାଗୀୟ ସମନ୍ବୟ ରକ୍ଷା ପୂର୍ବକ ସମସ୍ତ ତଳିଆ ଅଞ୍ଚଳରୁ ଲୋକଙ୍କୁ ଉଦ୍ଧାର ପାଇଁ ପାୱାରବୋଟ ଓ ଦେଶୀ ଡଙ୍ଗା ପ୍ରସ୍ତୁତ ରଖାଯାଇଛି। ସେହିଭଳି ଶୁଖିଲା ଖାଦ୍ୟ, ପାଣି ବୋତଲ, ବ୍ଲିଚିଂ ପାଉଡର ଓ ଆବଶ୍ୟକ ସାଧନ ପର୍ଯ୍ୟାପ୍ତ ପରିମାଣରେ ମହଜୁଦ ରଖାଯାଇଥିବା ଜରୁରୀକାଳୀନ ଅଧିକାରୀ ଶ୍ରୀ ଜେନା ପ୍ରକାଶ କରିଛନ୍ତି। ଅନ୍ୟପକ୍ଷରେ ଅଧା ପାଚିଥିବା ଧାନ ଅମଳ କରିବା ଓ ସମୁଦ୍ରକୁ ମତ୍ସ୍ୟଜୀବୀ ନଯିବାକୁ ପ୍ରଶାସନ ପକ୍ଷରୁ ପରାମର୍ଶ ଦିଆଯାଇଛି। ସେହିଭଳି ଆସନ୍ନ ପ୍ରସବାଙ୍କୁ ନିକଟସ୍ଥ ହସ୍ପିଟାଲକୁ ଏବେ ସ୍ଥାନାନ୍ତର ପାଇଁ ଉପକ୍ରମ ଆରମ୍ଭ ହୋଇଥିବା ଶ୍ରୀ ଜେନା କହିଛନ୍ତି।
