ମୁମ୍ବଇ : ଭାରତଠାରୁ ଇରାନ ଚିନି କିଣିଛି ଓ ମାର୍ଚ୍ଚ କିମ୍ବା ଏପ୍ରିଲ ମାସରୁ ଚିନି ରପ୍ତାନୀ ଆରମ୍ଭ ହେବ ବୋଲି ବାଣିଜ୍ୟ ସୂତ୍ରରୁ ଜାଣିବାକୁ ମିଳିଛି। ଆମେରିକାର କଟକଣା ଯୋଗୁଁ ଇରାନ ବ୍ୟାପାର ନେଣଦେଣ କ୍ଷେତ୍ରରେ ଆମେରିକା ଡଲାର ବ୍ୟବହାର କରିପାରୁନାହିଁ। ଏପଟେ ଟଙ୍କା ନେଇ ତେଲ ଦେବାକୁ ଇରାନ ଓ ଭାରତ ମଧ୍ୟରେ ଏକ ବୁଝାମଣା ହୋଇଛି। ଏହି ବୁଝାମଣା ଅନୁସାରେ ଇରାନ ଟଙ୍କା ନେଇ ଭାରତକୁ ତେଲ ଦେବ ଓ ସେହି ଟଙ୍କାରେ ଭାରତୀୟ ସାମଗ୍ରୀ କିଣି ପାରିବ। ଚିନି ନେବା ପାଇଁ ଇରାନ ଭାରତର କେତେକ ବାଣିଜ୍ୟିକ ସଂସ୍ଥାକୁ ଯୋଗାଯୋଗ କରିଛି। ମାର୍ଚ୍ଚ ଓ ଏପ୍ରିଲ ମାସରେ ଇରାନ ୧୫୦,୦୦୦ ଟନ୍ ଚିନି ପାଇଁ ବରାଦ ଦେଇଛି। ବରାଦ ଅନୁସାରେ ପ୍ରତି ଟନ୍ ଚିନି ପାଇଁ ଇରାନ ୩୦୫ ଡଲାର ଦେବ। ୟୁକୋ ବ୍ୟାଙ୍କ ଜରିଆରେ ଉଭୟ ଦେଶ ମଧ୍ୟରେ ତେଲ ବ୍ୟାପାର ହେଉଛି। ଇରାନ ଏହି ଟଙ୍କାରେ ଭାରତୀୟ ସାମଗ୍ରୀ କିଣିବା ଆରମ୍ଭ କରିଛି।
