କଲ୍ୟାଣସିଂହପୁର: କଲ୍ୟାଣସିଂହପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ସଂଯୋଗ କରୁଥିବା ରାସ୍ତା ପାଲିଟିଛି ମରଣଯନ୍ତା। ଡାକ୍ତରଖାନା ଆସୁଥିବା ଅନେକ ରୋଗୀମାନଙ୍କ ସହ ସାଧାରଣ ଲୋକେ ମଧ୍ୟ ହନ୍ତସନ୍ତ ହେବା ସହ ଅନେକ ଅସୁବିଧାର ସମ୍ମୁଖୀନ ହେଉଥିବା ଦେଖିବାକୁ ମିଳିଛି। ଶୋଚନୀୟ ରାସ୍ତା ହୋଇଥିବାରୁ ନିତିଦିନିଆ ଆମ୍ବୁଲାନ୍ସ ଯିବା ଆସିବାରେ ମଧ୍ୟ ଅସୁବିଧା ସମ୍ମୁଖୀନ ହେଉଛି। ଏଭଳି ଘଟଣା ଦେଖିବାକୁ ମିଳିଛି ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ସଦରମହକୁମାରେ ଥିବା ଏକମାତ୍ର ଗୋଷ୍ଠୀସ୍ୱାସ୍ଥ୍ୟକେନ୍ଦ୍ରରେ। ରାଜ୍ୟରାଜପଥ ମୁଖ୍ୟ ରାସ୍ତା ଠାରୁ ଲ୍ୟାମ୍ପ ସମ୍ମୁଖଦେଇ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଯାଉଥିବା ରାସ୍ତା ବହୁତ ଖରାପ ହୋଇଛି। ଲ୍ୟାମ୍ପ ସମ୍ମୁଖରେ କରାଯାଇଥିବା ସିମେଣ୍ଟ ରାସ୍ତାର ଛୋଟ ଛୋଟ ଗୋଡି ଗୁଡିକ ବାହାରି ଯିବାରୁ ଲୁହା ଛଡ଼ ଗୁଡିକ ବାହାରକୁ ଟେକି ହୋଇ ରହିଛି। ଯାହାଫଳରେ ସ୍ୱାସ୍ଥ୍ୟ କେନ୍ଦ୍ରକୁ ଓ ନିକଟରେ ଥିବା ଆଦିବାସୀ ସାହି ଓ ଭୈରବୀ ସାହିକୁ ଯାତାୟାତ କରୁଥିବା ଲୋକମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଉକ୍ତ ରାସ୍ତାରେ ରାତିକାଳୀନ ଯାତାୟାତ କଲେ ଉକ୍ତ ଲୁହା ଛଡ଼ ବାଜି କିଛି ଲୋକ ଆହତ ହୋଇଥିବା ନଜରକୁ ଆସିଛି। ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ରୋଗିବୁହା ଗାଡି, ବାଇକ ଯାତାୟାତ କରୁଥିବା ବେଳେ ସିମେଣ୍ଟ ଗୋଦାମକୁ ମାଲ ବୋଝେଇ ଟ୍ରକ ଓ ଲ୍ୟାମ୍ପକୁ ମଧ୍ୟ ସାର ଓ ବିହନ ବୋଝେଇ ଟ୍ରକ ଯାତାୟାତ କରି ଉକ୍ତ ରାସ୍ତାରେ ଗାତ ସୃଷ୍ଟି ହୋଇଛି। ସାମାନ୍ୟ ବର୍ଷା ହେଲେ ସେହି ସ୍ଥାନରେ ପାଣି ଜମା ହୋଇ ରହି ଯାଉଛି। ଯାହାଫଳରେ ଗାଡି ଓ ଲୋକମାନେ ଯାତାୟାତ କରିବାକୁ ଭୟ କରୁଛନ୍ତି। ଏଥିପ୍ରତି ପ୍ରଶାସନ ତୁରନ୍ତ ଦୃଷ୍ଟି ଦେଇ ଉକ୍ତ ରାସ୍ତାକୁ ମରାମତି କରିବା ପାଇଁ ସାଧାରଣରେ ଦାବି ହେଉଛି । ବର୍ତ୍ତମାନ ଲ୍ୟାମ୍ପକୁ ସାର୍ ଓ ବିହନ ଗାଡ଼ି ଆସି ଉକ୍ତ ରାସ୍ତାରେ ରଖି ଅନଲୋଡ କରୁଥିବାରୁ ଯାତାୟତରେ ଅସୁବିଧା ମଧ୍ୟ ହେଉଛି।
୬୦ ହଜାରରୁ ବି କମ୍; ଜବରଦସ୍ତ ରେଞ୍ଜ, ଲଞ୍ଚ ହେଲା ସବୁଠାରୁ ଶସ୍ତା ଇଲେକ୍ଟ୍ରିକ୍ ସ୍କୁଟର..
