ସମାଜ ଡିଜିଟାଲ ଡେସ୍କ: ଭାରତ ଏବଂ ପାକିସ୍ତାନ ମଧ୍ୟରେ ଜାରି ରହିଥିବା ଉତ୍ତେଜନା ମଧ୍ୟରେ ଭାରତ ସରକାର ପାକ୍ ବିମାନ ଉପରେ ଲାଗୁ କରିଥିବା ବାୟୁସୀମା କଟକଣା ଆଉ ଏକ ମାସ ବୃଦ୍ଧି କରିଛନ୍ତି। ଅର୍ଥାତ ଜୁନ ୨୩ ପର୍ଯ୍ୟନ୍ତ ପାକିସ୍ତାନ ବିମାନ ଭାରତୀୟ ବାୟୁସୀମାରେ ପ୍ରବେଶ କରିପାରିବେ ନାହିଁ। ପହଲଗାଓଁ ଆକ୍ରମଣ ପରେ ଭାରତ ପକ୍ଷରୁ ଏହି କଟକଣା ଲାଗୁ କରାଯାଇଥିଲା।
ଶୁକ୍ରବାର ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ପକ୍ଷରୁ ଏହି ନୂଆ ନୋଟାମ(ନୋଟିସ ଟୁ ଏୟାରମେନ/ଏୟାର ମିସନ) ଜାରି କରାଯାଇଛି। ନୋଟିସ ଅନୁସାରେ, ପାକିସ୍ତାନର କୌଣସି ଏୟାରଲାଇନ୍ସ ଦ୍ଵାରା ପରିଚାଳିତ, ମାଲିକାନା ଥିବା ଅଥବା ଲିଜ୍ ନିଆଯାଇଥିବା ବିମାନ ଉଡ଼ାଣକୁ ଭାରତର ଆକାଶମାର୍ଗରେ ପ୍ରବେଶ ଅନୁମତି ଦିଆଯିବ ନାହିର୍ର୍। ଏଥିରେ ସୈନ୍ୟ ବିଭାଗ ମଧ୍ୟ ସାମିଲ ରହିଛି।
ସୂଚନାଯୋଗ୍ୟ, ଭାରତକୁ ଆସୁଥିବା ଇଣ୍ଡିଗୋର ଏକ ଯାତ୍ରୀବାହୀ ବିମାନ ଟର୍ବୁଲେନ୍ସ କାରଣରୁ ଜରୁରୀ ଅବତରଣ ଲାଗି ପାକିସ୍ତାନକୁ ଅନୁରୋଧ କରିଥିବାବେଳେ ତାହାକୁ ଅନୁମତି ଦିଆଯାଇ ନ ଥିଲା। ପାକିସ୍ତାନର ଏଭଳି ପଦକ୍ଷେପ ପରେ ଭାରତ ସରକାର ଏହି ନିଷ୍ପତ୍ତି ନେଇଥିବା କୁହାଯାଉଛି।
