ନୂଆଦିଲ୍ଲୀ : ପଶ୍ଚିମବଙ୍ଗରେ ସିବିଆଇର କାର୍ଯ୍ୟାନୁଷ୍ଠାନ ଉପରେ ସୁପ୍ରିମକୋର୍ଟଙ୍କ ରାୟ ଆସିବା ପରେ କଂଗ୍ରେସ ନିଜ ଭାବ ଓ ବ୍ୟବହାରରେ କିଛିଟା ପରିବର୍ତ୍ତନ କରିଛି। କଂଗ୍ରେସ ଦଳ ଏବେ ସଂସଦ ଭିତରେ ଓ ବାହାରେ ତୃଣମୂଳ କଂଗ୍ରେସ (ଟିଏମ୍ସି)ଠାରୁ ଦୂରରେ ରହିବାକୁ ଚେଷ୍ଟା କରୁୁଥିବା ଦେଖିବାକୁ ମିଳୁଛି।
ଉଲ୍ଲେଖଯୋଗ୍ୟ ଯେ କଲକତାରେ ସିବିଆଇ କାର୍ଯ୍ୟାନୁଷ୍ଠାନ ବିରୋଧରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ଟିଏମ୍ସି ଅଧ୍ୟକ୍ଷା ମମତା ବାନାର୍ଜୀ ଧାରଣାରେ ବସିଥିଲେ। ସଂସଦରେ ସିବିଆଇ କାର୍ଯ୍ୟାନୁଷ୍ଠାନ ବିରୋଧରେ ହଙ୍ଗାମା କରୁଥିବା ତୃଣମୂଳ କଂଗ୍ରେସ ସାଂସଦଙ୍କୁ କଂଗ୍ରେସ ସମର୍ଥନ ଦେଇଥିଲା। ସିବିଆଇ କାର୍ଯ୍ୟାନୁଷ୍ଠାନ ବିରୋଧରେ କଂଗ୍ରେସ ଖୋଲାଖୋଲି ଭାବେ ମମତାଙ୍କ ସମର୍ଥନ କରିଥିଲା। ମମତା ବାନାର୍ଜୀଙ୍କ ସମର୍ଥରେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ଟ୍ୱିଟ୍ ମଧ୍ୟ କରିଥିଲେ। ସମସ୍ତ ବିରୋଧୀ ଦଳ ମିଶି ଫାଶୀବାଦୀ ଶକ୍ତିଙ୍କୁ ହରାଇବା ଆବଶ୍ୟକ ବୋଲି କଂଗ୍ରେସ ପକ୍ଷରୁ କୁହାଯାଇଥିଲା। ମଙ୍ଗଳବାର ସୁପ୍ରିମକୋର୍ଟଙ୍କ ରାୟ ଆସିବା ପରେ କଂଗ୍ରେସ ନିଜ ବ୍ୟବହାରରେ ପରିବର୍ତ୍ତନ ଆଣିଛି। ବୁଧବାର କଂଗ୍ରେସର ବରିଷ୍ଠ ନେତା ପ୍ରତାପ ସିଂହ ବାଜୱା କହିଛନ୍ତି ଯେ କଲକାତାରେ ସିବିଆଇ କାର୍ଯ୍ୟାନୁଷ୍ଠାନ ନେଇ ଅଦାଲତଙ୍କ ନିଷ୍ପତ୍ତିକୁ ମାନିବାକୁ ପଡ଼ିବ। ଆମେ କେନ୍ଦ୍ର ସରକାରଙ୍କ କାର୍ଯ୍ୟଶୈଳୀ ବିରୋଧରେ କହୁଛୁ। ସିବିଆଇ କିଭଳି ରାଜ୍ୟ ସରକାରଙ୍କୁ ନକହି ସେଠାକୁ ଯାଇଥିଲା ତାର ପ୍ରତବାଦ କରୁଥିଲୁ।
କଂଗ୍ରେସର ଏହି ପରିବର୍ତ୍ତନ ପାଇଁ ଲୋକସଭା ନିର୍ବାଚନ ଋଣନୀତି ରହିଛି ବୋଲି କୁହାଯାଉଛି। ପଶ୍ଚିମବଙ୍ଗରେ ଏବେ ମେଣ୍ଟ ଚିତ୍ର ସ୍ପଷ୍ଟ ହୋଇନାହିଁ। ଚନ୍ଦ୍ରବାବୁ ନାଇଡୁଙ୍କ ସହ ମିଶି କଂଗ୍ରେସ ଓ ବିଜେପିକୁ ଛାଡ଼ି ତୃତୀୟ ସାମୁଖ୍ୟ ଗଠନ ଲକ୍ଷ୍ୟରେ ଥିବା ମମତା ଏପର୍ଯ୍ୟନ୍ତ ନିଜ ଆଭିମୁଖ୍ୟ ସ୍ପଷ୍ଟ କରିନାହାନ୍ତି। ମେଣ୍ଟ ନହେଲେ କଂଗ୍ରେସ ଓ ଟିଏମ୍ସି ପ୍ରତିଦ୍ୱନ୍ଦ୍ୱୀ ଭାବେ ନିର୍ବାଚନ ମଇଦାନକୁ ଓହ୍ଲାଇବେ। ସେତେବେଳେ କଂଗ୍ରେସ ଶାରଦା ଦୁର୍ନୀତି କଥା ଉଠାଇବ। ଏଥିପାଇଁ ଦଳ ମମତା ଓ ଟିଏମ୍ସି ନେତାଙ୍କଠାରୁ ଦୂରତା ବଢାଉଛନ୍ତି।
ସୁପ୍ରିମକୋର୍ଟଙ୍କ ରାୟ ପରେ ଟିଏମ୍ସି ଠାରୁ ଦୂରତା ବଢାଇଲା କଂଗ୍ରେସ
Popular Categories
Previous article
Next article