ସମାଜ ଡିଜିଟାଲ ଡେସ୍କ: ବ୍ରିସବେନରେ ଚାଲିଥିବା ୩ୟ ଟେଷ୍ଟ ମ୍ୟାଚରେ ଘରୋଇ ଅଷ୍ଟ୍ରେଲିଆ ଦଳ ଦୃଢ଼ ସ୍ଥିତିରେ ରହିଛି। ୨ୟ ଦିନ ସୁଦ୍ଧା ଷ୍ଟିଭ ସ୍ମିଥ ଏବଂ ଟ୍ରାଭିସ ହେଡଙ୍କ ବିସ୍ଫୋରକ ଶତକ ବଳରେ ଦଳ ୭ ଉଇକେଟ ହରାଇ ସଂଗ୍ରହ କରିଛି ୪୦୫ ରନ୍। ଭାରତୀୟ ଦ୍ରୁତ ବୋଲର ଯଶପ୍ରୀତ ବୁମରାଙ୍କ ଦମଦାର ବୋଲିଂ ସତ୍ବେ ଟିମ ଇଣ୍ଡିଆ ଘରୋଇ ଦଳକୁ ଅଟକାଇବାରେ ବିଫଳ ହୋଇଛି।
ଟସ ଜିତି ଭାରତ ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା। ଆରମ୍ଭରୁ ଭାରତୀୟ ବୋଲରମାନେ ଭଲ ପ୍ରଦର୍ଶନ କରି ୭୫ ରନ୍ ମଧ୍ୟରେ ଅଷ୍ଟ୍ରେଲିଆର ଟପ୍ ୩ ଜଣ ଖେଳାଳିଙ୍କୁ ଆଉଟ୍ କରିବାରେ ସକ୍ଷମ ହୋଇଥିଲେ। ହେଲେ ସ୍ମିଥ ଏବଂ ହେଡ୍ଙ୍କ ଯୋଡ଼ି ଭାଙ୍ଗିବାରେ ଭାରତୀୟ ବୋଲର ବିଫଳ ହୋଇଥିଲେ। ଉଭୟେ ୪ର୍ଥ ଉଇକେଟରେ ୨୪୧ ରନର ଭାଗିଦାରି କରି ଦଳର ସ୍ଥିତିକୁ ଦୃଢ଼ କରିଥିଲେ। ସ୍ମିଥ ୧୦୧ ରନ ଏବଂ ହେଡ ୧୫୨ ରନ୍ କରି ଆଉଟ ହୋଇଥିଲେ। ଅନ୍ୟମାନଙ୍କ ମଧ୍ୟରେ ଆଲେକ୍ସ କ୍ୟାରି ୪୫ ରନ କରିଥିଲେ। ଭାରତ ପକ୍ଷରୁ ବୁମରା ସର୍ବାଧିକ ୫ ଉଇକେଟ ଅକ୍ତିଆର କରିଥିବାବେଳେ ମହମ୍ମଦ ସିରାଜ ଏବଂ ନିତିଶ କୁମାର ରେଡ୍ଡୀ ଗୋଟିଏ ଲେଖାଏ ଉଇକେଟ ନେଇଥିଲେ।
