କେନ୍ଦୁଝରରେ ନର୍ସିଂ କର୍ମଚାରୀ ସଂଘର କାର୍ଯ୍ୟ ବନ୍ଦ ଆନ୍ଦୋଳନ

କେନ୍ଦୁଝର ସଦର/ କେନ୍ଦୁଝରଗଡ଼: ଓଡ଼ିଶା ନର୍ସିଂ କର୍ମଚାରୀ ସଂଘ କେନ୍ଦୁଝର ଶାଖା ପକ୍ଷରୁ ଦଶ ଦଫା ଦାବି ପୂରଣ ନେଇ ସମ୍ପୂର୍ଣ୍ଣ କାର୍ଯ୍ୟ ବନ୍ଦ ଆନ୍ଦୋଳନ ଆରମ୍ଭ ହୋଇଛି। ଜିଲାର ସମସ୍ତ ସରକାରୀ ଡାକ୍ତରଖାନାରେ ଆନ୍ଦୋଳନ ଯୋଗୁଁଁ ନର୍ସିଂ ସେବା ବ୍ୟାହତ ହୋଇଛି। ରୋଗୀମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। କେତେକ ହାତଗଣତି ଆଉଟସୋର୍ସିଂଙ୍କୁ ନେଇ ସେବା କାର୍ଯ୍ୟ ସମ୍ପନ୍ନ କରିବା ମେଡିକାଲ ପ୍ରଶାସନ ପାଇଁ କାଠିକର ପାଠ ହୋଇପଡ଼ିଛି। ଉପଦେଷ୍ଟା ସୀତା ଭୋଳ, ସମ୍ପାଦିକା ଶକୁନ୍ତଳା ସରଦାର, ଉପସଭାପତି ଶରତ ଚନ୍ଦ୍ର ମାଝୀ, ଯୁଗ୍ମ ସମ୍ପାଦିକା କୁନ୍ତଳା ମହାନ୍ତ, ସୁଜନ ସାହୁ ପ୍ରମୁଖଙ୍କ ନେତୃତ୍ୱରେ ସମସ୍ତ ନିୟମିତ ନର୍ସିଂ ଷ୍ଟାପ୍‌‌ ଏହି ଆନ୍ଦୋଳନରେ ସାମିଲ ହୋଇଛନ୍ତି। ଦାବି ପୂରଣ ନହେବା ପର୍ଯ୍ୟନ୍ତ ଆନ୍ଦୋଳନ ଚାଲୁ ରହିବ ବୋଲି ଚେତାବନୀ ଦେଇଛନ୍ତି।