ମନ୍ଦିର ପ୍ରସାଦରୁ ବାହାରୁଛି ମୂଷା ଛୁଆ: ତିରୁପତି ପରେ ସିଦ୍ଧିବିନାୟକ ମନ୍ଦିରକୁ ନେଇ ବିବାଦ…

ମୁମ୍ବଇ : ମୁମ୍ବଇସ୍ଥିତ ସିଦ୍ଧିବିନାୟକ ମନ୍ଦିର ତରଫରୁ ଭକ୍ତଙ୍କୁ ବଣ୍ଟନ କରାଯାଉଥିବା ପ୍ରସାଦ ପ୍ୟାକେଟରୁ ମୂଷା ବାହାରିଥିବାର ଏକ ଭିଡିଓ ବର୍ତ୍ତମାନ ସାମାଜିକ ଗଣମାଧ୍ୟମରେ ଘୂରି ବୁଲୁଛି। ତେବେ ଏହି ପ୍ରସାଦ ଅନ୍ୟ କେଉଁ ମନ୍ଦିରର ବୋଲି ‘ଶ୍ରୀ ସିଦ୍ଧିବିନାୟକ ଗଣପତି ମନ୍ଦିର ଟ୍ରଷ୍ଟ’ ପକ୍ଷରୁ କୁହାଯାଇଛି। ଟ୍ରଷ୍ଟ ଅଧ୍ୟକ୍ଷ ସଦା ସର୍ଭଙ୍କର କହିଛନ୍ତି ଯେ ଦୈନିକ ଲକ୍ଷାଧିକ ଲଡୁ ଭକ୍ତଙ୍କ ମଧ୍ୟ ବଣ୍ଟନ କରାଯାଉଛି। ଏହି ଲଡୁ ପରିଷ୍କାର ପରିଚ୍ଛନ୍ନ ପରିବେଶରେ ପ୍ରସ୍ତୁତ କରାଯାଉଛି। ତେବେ ଯେଉଁ ଭିଡିଓ ପ୍ରସାରିତ ହେଉଛି ସେଠାକାର ପରିବେଶ ଅତ୍ୟନ୍ତ ଦୁର୍ଗନ୍ଧମୟ ଏବଂ ଆବର୍ଜନାପୂର୍ଣ୍ଣ ବୋଲି ସେ କହିଛନ୍ତି। ଟ୍ରଷ୍ଟ ଅଧ୍ୟକ୍ଷଙ୍କ ଏତାଦୃଶ ସ୍ପଷ୍ଟୀକରଣ ସତ୍ତ୍ବେ ମାମଲାର ଯାଞ୍ଚ କରାଯିବ ବୋଲି ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଦେ କହିଛନ୍ତି। ଯଦି ଲଡୁ ପ୍ରସ୍ତୁତିରେ କୌଣସି ଅନିୟମିମତା ଲକ୍ଷ୍ୟ କରାଯିବ, ତାହାହେଲେ ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସିନ୍ଦେ ପ୍ରତିଶ୍ରୁତି ଦେଇଛନ୍ତି।