ପିପିଲି : ପିପିଲି ତହସିଲ ଅଞ୍ଚଳରେ ଥିବା ବିଭିନ୍ନ ବାଲିଘାଟରୁ ବେଆଇନ ଭାବେ ବାଲି ଉତ୍ତୋଳନ କରାଯାଇ ଚୋରାଚାଲାଣ କରାଯାଉଥିବା ବେଳେ ଗୁରୁବାର ଜିଲା ପ୍ରଶାସନର ସ୍ୱତନ୍ତ୍ର ସ୍କ୍ୱାର୍ଡ ଏକ ବେଆଇନ ବାଲିଘାଟ ଉପରେ ଚଢାଉ କରି ୪ଟି ବାଲିବୋଝେଇ ଟ୍ରାକ୍ଟର ସହ ୨ଟି ଡାଲାକୁ ଜବତ କରିଛି।
ପୁରୀ ଜିଲାପାଳ ଜ୍ୟୋତିପ୍ରକାଶ ଦାସଙ୍କ ନିର୍ଦ୍ଦେଶରେ ପୁରୀ ତହସିଲଦାର ବରେଣ୍ୟ ମହାନ୍ତି, ଉପଜିଲାପାଳଙ୍କ କାର୍ଯ୍ୟାଳୟର ଆସିଷ୍ଟାଣ୍ଟ ଜିଲାପାଳ ରାମ ପଟ୍ଟନାୟକ, ସହକାରୀ କର୍ମଚାରୀ ନାରାୟଣ ପ୍ରଧାନ, ଆଶିଷ କୁମାର ପାତ୍ର ପ୍ରମୁଖଙ୍କୁ ନେଇ ଗଠିତ ଏକ ସ୍ୱତନ୍ତ୍ର ସ୍କ୍ୱାର୍ଡ ଗୁରୁବାର ପିପିଲି ତହସିଲ ଅନ୍ତର୍ଗତ ତୋଟାପଡା ସ୍ଥିତ ଦୟାନଦୀରେ ଚାଲିଥିବା ବେଆଇନ ବାଲିଘାଟ ଉପରେ ଚଢାଉ କରିଥିଲେ। ପିପିଲିର ଅତିରିକ୍ତ ତହସିଲଦାର ଧୋବେଇ ନାୟକ ମଧ୍ୟ ସେଠାରେ ଉପସ୍ଥିତ ଥିଲେ। ସେଠାରୁ ୪ଟି ବାଲିବୋଝେଇ ଟ୍ରାକ୍ଟର ଓ ୨ଟି ଟ୍ରାକ୍ଟର ଡାଲାକୁ ଜବତ କରାଯାଇଥିଲା। ଅନ୍ୟ କେତେକ ଗାଡି ସେଠାରୁ ଖସି ପଳାଇବାରେ ସକ୍ଷମ ହୋଇଥିଲେ। ଏହି ଚଢାଉ ସମୟରେ ପିପିଲି ପୁଲିସ ସହଯୋଗ କରିଥିଲା। ଏହା ପୂର୍ବରୁ ଗତ ୮ ତାରିଖ ଦିନ ପିପିଲି ତହସିଲ ପକ୍ଷରୁ ଚଢାଉ କରାଯାଇ ୨ଟି ବାଲି ବୋଝେଇ ଟ୍ରାକ୍ଟରକୁ ଜବତ କରାଯିବା ସହ ଉଭୟ ଗାଡିରୁ ଜୋରିମାନା ଆଦାୟ କରାଯାଇଥିଲା।
