ଡେସ୍କ: WorldAtlas.com ଦ୍ୱାରା ପ୍ରକାଶିତ ବିଶ୍ୱର ୧୦ଟି ବୃହତ୍ତମ କୋଇଲା ଖଣି ତାଲିକାରେ ଛତିଶଗଡ଼ର କୋଲ୍ ଇଣ୍ଡିଆର ସହାୟକ ସଂସ୍ଥା ସାଉଥ୍ ଇଷ୍ଟର୍ଣ୍ଣ କୋଲ୍ ଫିଲ୍ଡସ୍ ଲିମିଟେଡ୍ (ଏସ୍ଇସିଏଲ୍)ର ଗେଭରା ଓ କୁସମୁଣ୍ଡା କୋଇଲା ଖଣି ଦ୍ବିତୀୟ ଓ ଚତୁର୍ଥ ସ୍ଥାନ ଅଧିକାର କରିଛନ୍ତି।
ଛତିଶଗଡ଼ ରାଜ୍ୟର କୋରବା ଜିଲ୍ଲାରେ ଅବସ୍ଥିତ ଏହି ଦୁଇଟି ଖଣିରୁ ବାର୍ଷିକ ୧୦୦ ନିୟୁତ ଟନରୁ ଅଧିକ କୋଇଲା ଉତ୍ପାଦନ ହୋଇଥାଏ ଯାହା ଭାରତର ମୋଟ କୋଇଲା ଉତ୍ପାଦନର ପ୍ରାୟ ୧୦% ଅଟେ। ଗେଭରା ଓପନକାଷ୍ଟ ଖଣିର ବାର୍ଷିକ ଉତ୍ପାଦନ କ୍ଷମତା ୭୦ ନିୟୁତ ଟନ୍ ଏବଂ ଆର୍ଥିକ ବର୍ଷ ୨୩-୨୪ରେ ୫୯ ନିୟୁତ ଟନ୍ କୋଇଲା ଉତ୍ପାଦନ ହୋଇଥିଲା। ୧୯୮୧ ମସିହାରେ ଏହି ଖଣି କାର୍ଯ୍ୟ ଆରମ୍ଭ କରିଥିଲା ଏବଂ ଆଗାମୀ ୧୦ ବର୍ଷ ପାଇଁ ଦେଶର ଶକ୍ତି ଆବଶ୍ୟକତା ପୂରଣ କରିବା ପାଇଁ ଏଥିରେ ପର୍ଯ୍ୟାପ୍ତ କୋଇଲା ଭଣ୍ଡାର ରହିଛି।
ସେହିପରି ୨୩-୨୪ ଆର୍ଥିକ ବର୍ଷରେ କୁସମୁଣ୍ଡା ଓପନକାଷ୍ଟ ଖଣିରୁ ୫୦ ନିୟୁତ ଟନରୁ ଅଧିକ କୋଇଲା ଉତ୍ପାଦନ ହୋଇଥିଲା, ଯାହା ଗେଭରା ପରେ ଭାରତରେ ଦ୍ୱିତୀୟ ଖଣି ଭାବେ ଏହି ସଫଳତା ହାସଲ କରିଥିଲା।
ଏହି ଖଣିଗୁଡ଼ିକ ବିଶ୍ୱର କେତେକ ବୃହତ୍ତମ ଏବଂ ଅତ୍ୟାଧୁନିକ ଖଣି ମେସିନ୍ ସର୍ଫେସ୍ ମାଇନର ନିୟୋଜିତ କରିଛନ୍ତି ଯାହା ପରିବେଶ ଅନୁକୂଳ ଖଣି କାର୍ଯ୍ୟ ପାଇଁ ବିସ୍ଫୋରଣ ନକରି କୋଇଲା ଉତ୍ତୋଳନ କରିବା ସହ କାଟିଥାଏ।
Comments are closed.