ବାସୁଦେବପୁର: ବାସୁଦେବପୁର ସ୍ଥିତ ନାୟକାଣିଡ଼ିହି ଥାନା ବଡହାବେଳିସାହି ୫ ଘେରିଆ ଗାଁରେ ନିଖୋଜ ଥିବା ମା ଝିଅଙ୍କ ନର କଙ୍କାଳ ଠାବ ହୋଇଛି। ମା ଝିଅ ଦୁଇ ଜଣଙ୍କୁ ଅଭିଯୁକ୍ତ ଗୁରୁପଦ ଗାୟନ ହତ୍ୟା କରିଥିବା ସ୍ବୀକାର କରିଥିବା ଏସଡିପିଓସୌରଭ ଓତା ଗଣମାଧ୍ୟମକୁ ସୂଚନା ଦେଇଛନ୍ତି। ମୃତକଙ୍କ ନାମ ଯମୁନା ସାମଲ(୫୫), କୌଶଲ୍ୟା ଗାୟନ(୩୫) ବୋଲି ଜଣାପଡ଼ିଛି। ଅଟକ ଥିବା ଅଭିଯୁକ୍ତକୁ ପୁଲିସ ଘଟଣା ସ୍ଥଳକୁ ନେଇ ତଦନ୍ତ କରିଛି। ଆଉ ଅଭିଯୁକ୍ତ ହତ୍ୟାକାଣ୍ଡର ଡେମୋ ପ୍ରଦର୍ଶନ କରିଥିଲା।
ନାୟକାଣି ଡ଼ିହି ଥାନା ସାନ ହାବେଳି ସାହି ୫ ଘେରିଆ ଗାଁର ମା-ଝିଅ ସୁଭଦ୍ରା ଯୋଜନା ଆବେଦନ କରିବାକୁ ଯାଇ ୧୬ ଦିନ ତଳେ ନିଖୋଜ ହୋଇଥିଲେ। ପରିବାର ପକ୍ଷରୁ ଖୋଜାଖୋଜି କରି ନିରାଶ ହେବାପରେ ନିଖୋଜ ସମ୍ପର୍କରେ ସ୍ଥାନୀୟ ଥାନାରେ ଅଭିଯୋଗ କରାଯାଇଥିଲା। ଅଭିଯୋଗ ପାଇ ପୁଲିସ ପ୍ରାଥମିକ ତଦନ୍ତ କରିଥିଲା। ଏହି ଘଟଣାର କିଛିଦିନ ପରେ ସ୍ଥାନୀୟ ଚାଷୀ ଜମିରୁ ପାଣି କମାଇବା ସହ କଳା ପାହାଡିଆ ନାଳ ଖୋଳୁ ଥିବା ବେଳେ ଜେସିବିରେ ବସ୍ତା ଲାଗିଥିଲା।
ଏହି ବସ୍ତାରେ ଖପୁରୀ ଆଉ ହାଡ଼ ଥିବା ଜାଣିବାକୁ ପାଇ ପୁଲିସକୁ ଖବର ଦେଇଥିଲେ। ପୁଲିସ ଘଟଣାକୁ ଗୁରୁତ୍ବଦେଇ ତଦନ୍ତକୁ ଆଗକୁ ବଢ଼ାଇଛି। ଖପୁରୀ ମିଳିଥିବା ସ୍ଥାନରେ ପୁଲିସ ଜଗିରହିଛି। ଅନ୍ୟପଟେ ଘଟଣାରେ ଜଡିତ ଥିବା ସନ୍ଦେହରେ ଦୁଇ ଯୁବକକୁ ଅଟକରଖି ତଦନ୍ତ ଚଳାଇଥିବା ବଳେ ଗୁରୁପଦକୁ ପୁଲିସ ଗିରଫ କରିଛି। ହତ୍ୟାକାଣ୍ଡର ପ୍ରକୃତ କାରଣ ସମ୍ପର୍କରେ କୌଣସି ସୂଚନା ମିଳିନାହିଁ। ତେବେ ଅଧିକ ତଦନ୍ତ ପରେ ହତ୍ୟାକାଣ୍ଡର ପ୍ରକୃତ ରହସ୍ୟ ଜଣାପଡ଼ିବ ବୋଲି ପୁଲିସ ପକ୍ଷରୁ ପ୍ରକାଶ କରାଯାଇଛି।
