ଭୁବନେଶ୍ୱର . – କେନ୍ଦ୍ରୀୟ ମାନବାଧିକାର ସୁରକ୍ଷା ସଂସ୍ଥାର ଓଡ଼ିଶା ଚାପ୍ଟରର ଏକ ସ୍ୱତନ୍ତ୍ର ବୈଠକ ରାଜଧାନୀ ଭୁବନେଶ୍ୱରର ବୁଦ୍ଧ ମନ୍ଦିର ସମ୍ମେଳନ କକ୍ଷରେ ଅନୁଷ୍ଠିତ ହୋଇଯାଇଛି । କିନ୍ନରଙ୍କ ସାମାଜିକ ସୁରକ୍ଷା ପାଇଁ କାମ କରୁଥିବା ସଖା ସଂଗଠନର ମୁଖ୍ୟ ମୀରା ପରିଡାଙ୍କର ପୌରହିତ୍ୟରେ ଏହି ସ୍ୱତନ୍ତ୍ର ବୈଠକ ଅନୁଷ୍ଠିତ ହୋଇଥିଲା । ସଖା ସଂଗଠନ କିନ୍ନରମାନଙ୍କର ସାମାଜିକ ସୁରକ୍ଷା ଓ ଉତ୍ଥାନ ପାଇଁ ଅନେକ କାମ କରିବା ପରେ ଏବେ ସମାଜରେ ଥିବା ସାଧାରଣ, ଦରିଦ୍ର ଓ ନିଷ୍ପେସିତ ଲୋକଙ୍କ ଅଧିକାରର ସୁରକ୍ଷା ପାଇଁ ଅଣ୍ଟା ଭିଡିଛି । ସାରା ରାଜ୍ୟରେ ଏହାର ସ୍ୱେଚ୍ଛାସେବୀମାନେ ମାନବାଧିକାର ସୁରକ୍ଷା ପାଇଁ କାମ କରିବେ । ପୁଲିସ , ପ୍ରଶାସନ ସହ ସମସ୍ତ କ୍ଷେତ୍ରରେ ମାନବାଧିକାର କ୍ଷୁର୍ଣ୍ଣ ହେଉଥିବା ନାଗରିକମାନଙ୍କୁ ଏହାର ସ୍ୱେଚ୍ଛାସେବୀମାନେ ସୁରକ୍ଷା ଯୋଗାଇ ଦେବା ସହ ସଠିକ୍ ପରାମର୍ଶ ଦେଇ ପାରିବେ । ଏହା ସହ ବିଭିନ୍ନ ସଙ୍ଗଠନର ସହଯୋଗରେ ଜନନୀ ସୁରକ୍ଷା ପାଇଁ ୮୦ରୁ ଉର୍ଦ୍ଧ୍ୱ କିନ୍ନର ନିୟୋଜିତ ହେବେ ।
ଏହି ସ୍ୱତନ୍ତ୍ର ବୈଠକକୁ କିନ୍ନର ସାଧନା ମିଶ୍ର ପରିଚାଳନା କରିଥିବା ବେଳେ , ମେଘନାଙ୍କ ସହ ବହୁ କିନ୍ନର ସ୍ୱେଚ୍ଛାସେବୀ ଓ ସାଧାରଣ ସ୍ୱେଚ୍ଛାସେବୀ ଏଥିରେ ସାମିଲ ହୋଇ ସମାଜରେ ମାନବାଧିକାରର ସୁରକ୍ଷା ପାଇଁ ସଙ୍କଳ୍ପ ନେଇଥିଲେ । ଅନେକ ସ୍ୱେଚ୍ଛାସେବୀଙ୍କୁ ଏହି ଅବସରରେ ସମ୍ବର୍ଦ୍ଧିତ କରାଯାଇଥିଲା । ସମାଜସେବୀ ମଧୁ ଭାଇ, ସମାଜସେବୀ ତେଜ୍, ପୂର୍ବତନ ରାଜ୍ୟ ମହିଳା କମିଶନ ଅଧ୍ୟକ୍ଷା ତଥା ସମାଜସେବୀ ନମ୍ରତା ଚଢ଼ା ପ୍ରମୁଖ ଏହି ଅବସରରେ ସ୍ୱେଚ୍ଛା ସେବୀମାନଙ୍କୁ ଦିଗ୍ଦର୍ଶନ ଦେଇଥିଲେ ।
