କଲ୍ୟାଣସିଂହପୁର: ଲାଖପଦର ଗାଁରେ ହାତୀ ପଲଙ୍କ ଉପଦ୍ରବ ଦେଖିବାକୁ ମିଳିଛି। ହାତୀଗୁଡ଼ିକ ଗାଁରେ ଥିବା ବିଭିନ୍ନ ଲୋକଙ୍କ ଘର ଭାଙ୍ଗି ଦେବା ସହ ଖାଦ୍ୟ ସାମଗ୍ରୀ ନଷ୍ଟ କରିଥିବା ସୂଚନା ମିଳିଛି। ରାୟଗଡା ଜିଲା କଲ୍ୟାଣସିଂହପୁର ବ୍ଳକ ନିୟମଗିରି ଅଞ୍ଚଳ ପାର୍ଷାଲି ପଞ୍ଚାୟତର ଲାଖପର ଗାଁରେ ୪ଟି ହାତୀ ଆସି ଗାଁ ଚାରି ପାଖରେ ବୁଲି ଡ଼ଙ୍ଗରରେ ଥିବା ଚାଳଛପର ଘରଗୁଡ଼ିକ ଭାଙ୍ଗି ଦେଇଥିଲେ। ଏହାସହିତ ସେହି ଘରଗୁଡ଼ିକ ମଧ୍ୟରେ ରଖାଯାଇଥିବା ଜିନିଷ ପତ୍ର ଯଥା କୁସୁଲା, ମାଣ୍ଡିଆ, ହଳଦୀ, ଆମ୍ବ ଶଡା ଇତ୍ୟାଦି ଖାଦ୍ୟସାମଗ୍ରୀ ନଷ୍ଟ କରିଥିବା ଜଣାପଡ଼ିଛି।
ଲାଖପର ଗାଁର କୃଷିକା ଡ୍ରିଞ୍ଜୁ, ବାମୁନୁ କାଡ୍ରାକା, କାଳିଆ ସିକକା, ସୁକୃ ସିକକା, ପେଟା ସିକକା ଓ ପୁଲେମେ କାଡ୍ରାକାଙ୍କ ଚାଳଛପର ଘର ଭାଙ୍ଗିବା ସହ ଖାଦ୍ୟସାମଗ୍ରୀ ନଷ୍ଟ ହୋଇଥିବା ଅଭିଯୋଗ କରିଛନ୍ତି। ଖବର ପାଇ ବନ ବିଭାଗ କର୍ମଚାରୀ ଲାଖପର ଗାଁରେ ପହଞ୍ଚି ସ୍ଥିତି ପରଖିଛନ୍ତି। ବନାଞ୍ଚଳ ଅଧିକାରୀ ଚନ୍ଦନ ଗମାଙ୍ଗ କହିଛନ୍ତି ଯେ ଆମ କର୍ମଚାରମାନେ ଲାଖପର ଗାଁକୁ ଯାଇଛନ୍ତି। ତଦନ୍ତ କଲାପରେ କ୍ଷୟକ୍ଷତି ହୋଇଥିବା ପରିବାରଙ୍କ ତାଲିକା ପ୍ରସ୍ତୁତ କରି ରିପୋର୍ଟ ଦାଖଲ କରିବେ। ସେହି ରିପୋର୍ଟ ଆଧାରରେ ସରକାରଙ୍କ ନିୟମ ଅନୁସାରେ କ୍ଷତିଗ୍ରସ୍ତ ପରିବାରଗୁଡ଼ିକୁ ଅନୁକମ୍ପା ରାଶି ପ୍ରଦାନ କରାଯିବ ବୋଲି କହିଛନ୍ତି।
