ସମାଜ ଡିଜିଟାଲ ଡେସ୍କ: ଚୋରି କରିବା ପାଇଁ ଜିମ୍ରେ ପଶିଥିଲେ। ହେଲେ ଧରାପଡ଼ିବା ପରେ ନୟାନ୍ତ ହେଲେ। ଜିମ୍ ମାଲିକ ଚୋରକୁ ଧରିବା ସହିତ ଦଣ୍ଡିତ କରିଛନ୍ତି। ଦଣ୍ଡ ସ୍ୱରୂପ ଅଭିଯୁକ୍ତ ନାବାଳକକୁ ଟ୍ରେଡ୍ ମିଲ୍ରେ ତୀବ୍ର ବେଗରେ ଦୌଡ଼ାଇଛନ୍ତି। ଦୌଡ଼ାଇ ଦୌଡ଼ାଇ ନାବାଳକର ରାତି ଅଧରେ ଚୋରି ନିଶା ଛଡ଼ାଇଛନ୍ତି। ଘଟଣାଟି ଘଟିଛି ମଧ୍ୟପ୍ରଦେଶର ଦତିୟା ସହରରେ।
କୋତୱାଲି ଥାନା ଅନ୍ତର୍ଗତ ସୀତା ସାଗର ନିକଟରେ ଏକ ଜିମ ରହିଛି। ଗତ ରାତିରେ ଜଣେ ନାବାଳକ ଚୋରି କରିବା ଉଦ୍ଦେଶ୍ୟରେ ଜିମ୍ରେ ପଶିଥିଲା। ଘରେ ଶୋଇଥିବା ଜିମ ମାଲିକଙ୍କର ରାତି ଅଧରେ ହଠାତ ନିଦ ଭାଙ୍ଗିଥିଲା। ସେ ନିଜ ମୋବାଇଲ ଖୋଲି ଜିମରେ ଲାଗିଥିବା ସିସିଟିଭି କ୍ୟାମେରା ଯାଞ୍ଚ କରିଥିଲେ। ଏହି ସମୟରେ ଜିମ ଭିତରେ କେହି ଜଣେ ପଶିଥିବାର ଦେଖି ସେ ତୁରନ୍ତ ଘରୁ ଜିମ୍କୁ ଆସିଥିଲେ।
ଜିମ୍ ଖୋଲି ନାବାଳକଙ୍କୁ ମାଲିକ ଜଣକ ଧରିଥିଲେ। ଏହା ପରେ ତା’କୁ ଟ୍ରେଡ୍ ମିଲରେ ଅଧରାତିରେ ଦୌଡ଼ାଇଥିଲେ। ଟ୍ରେଡ୍ ମିଲ୍ର ବେଗ ବଢ଼଼ାଇ ତା’କୁ ଦୌଡ଼ାଇଥିଲେ। ନାବାଳକ ଜଣକ ଧଇଁସଇଁ ହୋଇଯିବା ସହ ଜୀବନରେ ଏଭଳି ଭୁଲ କରିବେ ନାହିଁ ବୋଲି କହିବାରୁ ମାଲିକ ଟ୍ରେଡ୍ ମିଲ୍ ବନ୍ଦ କରିଥିଲେ। ଏହା ପରେ ସକାଳେ ନାବାଳକକୁ ପୁଲିସ ଜିମା ଦେଇଥିଲେ।
