ଫୁଲବାଣୀ : ନିର୍ବାଚନ ପାଇଁ ବର୍ତ୍ତମାନ ଚୋରା ମଦ କାରବାର ବଢିଚାଲିଛି । କନ୍ଧମାଳ ଜିଲ୍ଲା ଫୁଲବାଣୀ ଟାଉନ ଥାନା ପୁଲିସ ଶନିବାର ଚୋରାରେ ମଦ ଚାଲାଣବେଳେ ଏକ କାରରୁ ବିପୁଳ ପରିମାଣର ବିଦେଶୀ ମଦ ଜବତ ସହ ଜଣକୁ ଗିରଫ କରିଛି । ଗିରଫ ବ୍ୟକ୍ତି ଜଣକ ଫିରିଙ୍ଗିଆ ବ୍ଲକ ଗୋଛାପଡା ଥାନା ଗୋଛାପଡାର ସ୍ୱାଧୀନ ସାହୁ ବୋଲି ଜଣାପଡିଛି ।
ଶନିବାର ଟାଉନ ଥାନା ପୁଲିସ ଫୁଲବାଣୀଠାରୁ ଗୋଛାପଡାକୁ ସଂଯୋଗ କରୁଥିବା ପଟାବାଲି ସାହି ନିକଟରେ ଦ୍ରୁତଗତିରେ ଆସୁଥିବା କାରଟିକୁ ଅଟକାଇ ଯାଞ୍ଚ ସମୟରେ କାରରୁ ୨୪ଟି ପେଟିରେ ଥିବା ୧୮୯ ଲିଟର ବିଦେଶୀ ମଦ ଜବତ କରିଥିଲା । ସମ୍ପୃକ୍ତ ମଦ ବ୍ୟବସାୟୀଙ୍କୁ ଗିରଫ କରିଥିବାବେଳେ ବ୍ୟବସାୟୀଙ୍କୁ କୋର୍ଟ ଚାଲାଣ କରାଯାଇଥିବା ଟାଉନ ଥାନା ଅଧିକାରୀ କନକ କୁମାର ମାଝୀ ସୂଚନା ଦେଇଛନ୍ତି ।
ସୂଚନାଯୋଗ୍ୟ ସମ୍ପୃକ୍ତ ମଦ ବ୍ୟବସାୟୀ ଜଣକ ଗୋଛାପଡା ମୁଖ୍ୟ ବଜାର ଉପରେ ଦୀର୍ଘ ବର୍ଷ ଧରି ବିଦେଶୀ ମଦ ବ୍ୟବସାୟ କରିଆସୁଥିଲେ । ଅନ୍ୟପଟେ ବଜାର ଉପରେ ଥିବା ତାଙ୍କ ଦୋକାନଠାରୁ ଗୋଛାପଡା ଥାନାରେ ଦୂରତା ମାତ୍ର ଅଧ କିଲୋମିଟର, ତଥାପି ଗୋଛାପଡା ପୁଲିସ ଏହି ମଦ କାରବାର ବିଷୟରେ ଜାଣିନଥିବା ବେଳେ ଏହି ମଦ ବ୍ୟବସାୟୀଙ୍କ ପାଖରୁ ସ୍ଥାନୀୟ ପୁଲିସ ଓ ଅବକାରୀ ବିଭାଗ ମୋଟା ଅଙ୍କର ବଟି ନେଇ ମଦ ବିକିବା ପାଇଁ ପ୍ରଶୟ ଦେଇ ଆସୁଥିଲେ ବୋଲି ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜୋର ଧରିଛି ।
