ଭୁବନେଶ୍ବର: ‘ଯୋଗିନୀ’ ଏକ ପରୀକ୍ଷାମୂଳକ ସଙ୍ଗୀତ ଭିତ୍ତିକ ଚଳଚ୍ଚିତ୍ର ଯାହା ଓଡ଼ିଆ ସିନେମା ଇତିହାସରେ କେବଳ ପ୍ରଥମ ନୁହେଁ ବରଂ ଭାରତୀୟ ସିନେମା ଦୁନିଆରେ ଏପରି ସିନେମା ଆଗରୁ ତିଆରି ହୋଇନାହିଁ। ଦଶମ/ଏକାଦଶ ଶତାବ୍ଦୀର ପୃଷ୍ଠଭୂମିରେ ତିଆରି ଏ ସିନେମାକୁ ଦେଖିଲେ ମନେ ହେବ ଯେମିତି ପୃଥିବୀର ସବୁ ସ୍ତ୍ରୀ ଲୋକମାନଙ୍କ ଭିତରେ ଗୋଟେ ଯୋଗିନୀ ଅଛି। କେବଳ ସଙ୍ଗୀତ ଓ ନୃତ୍ୟ ମାଧ୍ୟମରେ କାହାଣୀକୁ ଏତେ ବଳିଷ୍ଠ ରୂପରେ କୁହାଯାଇପାରେ ଯୋଗିନୀ ତା’ର ଏକ ଉଦାହରଣ। ଏହି ସିନେମାରେ ୨୮ଟି ନାୟିକା ରହିଛନ୍ତି।
ପ୍ରତ୍ୟେକଙ୍କର କାହାଣୀ ପ୍ରତ୍ୟେକଙ୍କଠୁ ଭିନ୍ନ ହେଲେ, ସେଇ ଭିନ୍ନତାରେ ଯେ’ କେତେ ସମାନତା ରହିଛି ତାହା ‘ଯୋଗିନୀ’ ଦେଖିଲେ ସହଜରେ ବୁଝି ହେଉଛି । ଯୋଗିନୀର ଉପସ୍ଥାପନା, ତା’ର ନିର୍ଦ୍ଦେଶନା, କାହାଣୀର ଆଧାର, ସଙ୍ଗୀତ, ଚିତ୍ରତ୍ତୋଳନଠୁ ପୋଷାକପତ୍ର ସବୁଥିରେ ନୂତନତ୍ତ୍ୱ ଭରି ରହିଛି । ଅନ୍ତର୍ଜାତୀୟ ସ୍ତରରେ ଅନେକ ପୁରସ୍କାର ପ୍ରାପ୍ତ ଯୋଗିନୀ ଚଳଚ୍ଚିତ୍ର ଓଡ଼ିଆ ଦର୍ଶକ ମନର ଗଭୀର ସୁକ୍ଷ୍ମ ଅନୁଭୂତିକୁ ଛୁଇଁଛି।
ପ୍ରତ୍ୟେକ ସମ୍ବେଦନଶୀଳ ମଣିଷ ଏ ସିନେମାକୁ ଗଭୀର ଭାବରେ ଉପଭୋଗ କରିବେ। ବୁଦ୍ଧିଜୀବୀ ମହଲରେ ଅନେକ ଆଦୃତ ମଧ୍ୟ ହୋଇଛି ‘ଯୋଗିନୀ’। ଏ ସିନେମାର ପ୍ରଯୋଜନା ସୁପ୍ରସିଦ୍ଧ ଗାୟିକା ସୁସ୍ମିତା ଦାସ ଏବଂ ସୁପ୍ରସିଦ୍ଧ ଲେଖିକା ଓ ଚଳଚ୍ଚିତ୍ର ନିର୍ଦ୍ଦେଶିକା ବିୟତ ପ୍ରଜ୍ଞା ତ୍ରିପାଠୀ କରିଛନ୍ତି। ସୁପ୍ରସିଦ୍ଧ କବି ଓ ଚିନ୍ତକ ହରପ୍ରସାଦ ଦାସଙ୍କ କବିତା ଏ ଚଳଚ୍ଚିତ୍ରର କାହାଣୀ। ସିନେମା ନିର୍ଦ୍ଦେଶନା ଦେଇଛନ୍ତି ବିୟତ ପ୍ରଜ୍ଞା ତ୍ରିପାଠୀ।
ଏ ସିନେମାର ୨୮ଟି ଗୀତ ଯାକ ଗୀତ ଗାଇଛନ୍ତି ସୁସ୍ମିତା ଦାସ। ସଙ୍ଗୀତ ନିର୍ଦ୍ଦେଶନା ଦେଇଛନ୍ତି ବଳିଷ୍ଠ ସଙ୍ଗୀତ ନିର୍ଦ୍ଦେଶକ ଓମ୍ ପ୍ରକାଶ ମହନ୍ତି। ଚିତ୍ରତ୍ତୋଳନ କରିଛନ୍ତି ଓଡ଼ିଆ ସିନେମା ଜଗତର ପ୍ରସିଦ୍ଧ କ୍ୟାମେରାମ୍ୟାନ ଧ୍ରୁବାନନ୍ଦ ପଣ୍ଡା। ନୃତ୍ୟ ନିର୍ଦ୍ଦେଶନା ବିୟତ ପ୍ରଜ୍ଞା ତ୍ରିପାଠୀ ଓ ସଫିଉଲ ହକ୍ । ପୋଷାକ ସାଜସଜ୍ଜା ବିଜ୍ଞାନ ପ୍ରଜ୍ଞା ପାଣି। ଏଡିଟିଂ କରିଛନ୍ତି ରାଜେଶ ଦାଶ ଓ ସାଉଣ୍ଡ ଡିଜାଇନ କରିଛନ୍ତି ନିତ୍ୟ ଶ୍ରୀରଞ୍ଜନ। ‘ଯୋଗିନୀ’ ଗୋଟେ କାଳଜୟୀ ସିନେମା । ପୃଥିବୀ ଯେତେ ପୁରୁଣା ହେଲେ ବି ଏ ସିନେମା ସବୁଦିନେ ସମକାଳୀନ ହୋଇ ରହିବ ବୋଲି ନିର୍ଦ୍ଦେଶକ ମତ ଦେଇଛନ୍ତି।
