ଡେସ୍କ: ତେଲେଙ୍ଗାନାର ମଞ୍ଚେରିଆଲ ଜିଲ୍ଲାର ଏକ ସ୍କୁଲରେ କିଛି ଛାତ୍ରଛାତ୍ରୀ ହନୁମାନ ଦିକ୍ଷା ପୋଷାକ ପିନ୍ଧିବାକୁ ଶିକ୍ଷକମାନେ ବିରୋଧ କରିବାରୁ ଏକ ଧାର୍ମିକ ସଂଗଠନର ସଦସ୍ୟମାନେ ବିକ୍ଷୋଭ ପ୍ରଦର୍ଶନ କରିବା ସହ ଭଙ୍ଗାରୁଜା କରିଛନ୍ତି। ମଦର ଟେରେସା ସ୍କୁଲର ଶିକ୍ଷକମାନେ ଛାତ୍ରଛାତ୍ରୀଙ୍କୁ ଶ୍ରେଣୀଗୃହ ଭିତରକୁ ପ୍ରବେଶ କରିବାକୁ ଦେଇନଥିବା ଅଭିଯୋଗ ହୋଇଛି।
ଛାତ୍ରଛାତ୍ରୀଙ୍କ ଅଭିଭାବକଙ୍କ ଅଭିଯୋଗ କ୍ରମେ ବୁଧବାର ଜଣେ ସ୍କୁଲ ପ୍ରତିନିଧି ଓ ପ୍ରଧାନଶିକ୍ଷକଙ୍କ ବିରୋଧରେ ଦଫା ୧୫୩(ଏ) (ଧର୍ମ କିମ୍ବା ଜାତି ଆଧାରରେ ବିଭିନ୍ନ ଗୋଷ୍ଠୀ ମଧ୍ୟରେ ଶତ୍ରୁତାକୁ ପ୍ରୋତ୍ସାହିତ କରିବା) ଏବଂ ୨୯୫(ଏ) (ଧାର୍ମିକ ଭାବନାକୁ ଅପମାନିତ କରିବା) ଅନୁଯାୟୀ ମାମଲା ରୁଜୁ କରାଯାଇଛି।
ତେବେ ସ୍କୁଲ ୟୁନିଫର୍ମ ପିନ୍ଧିନଥିବା ଦେଖି ପ୍ରଧାନଶିକ୍ଷକ କେବଳ ଅଭିଭାବକଙ୍କୁ ଆଣିବାକୁ କହିଥିଲେ ବୋଲି ସ୍କୁଲ କର୍ତ୍ତୃପକ୍ଷ କହିଛନ୍ତି।
ଏହାପରେ ହନୁମାନ ଦିକ୍ଷା ପୋଷାକ ପିନ୍ଧି ଥିବାରୁ ଛାତ୍ରଛାତ୍ରୀଙ୍କୁ ବିଦ୍ୟାଳୟ ଭିତରକୁ ପ୍ରବେଶ ଓ ବାର୍ଷିକ ପରୀକ୍ଷା ଦେବାକୁ ବାରଣ କରିଥିବାରୁ ପ୍ରଶାସନ ବିରୋଧରେ କାର୍ଯ୍ୟାନୁଷ୍ଠାନ ଦାବି କରି ଏକ ଧାର୍ମିକ ଗୋଷ୍ଠୀର ସଦସ୍ୟମାନେ ବିଦ୍ୟାଳୟ ବାହାରେ ବିକ୍ଷୋଭ ପ୍ରଦର୍ଶନ କରିଥିଲେ।
