ଆଠଗଡ : ଆଠଗଡ ଦେଇ ଯାଇଥିବା ପୁରୁଣା କଟକ-ସମ୍ବଲପୁର ରାସ୍ତାର ଦହିସରା ଓ ହରିପୁର ମଧ୍ୟବର୍ତ୍ତୀ ରାସ୍ତାରେ ଏକ କଲେଜ ବସ୍ ଦବିଯାଇ ଫସି ଯାଇଥିଲା । ଆଠଗଡରୁ ଧବଳେଶ୍ବର ଉକ୍ତ ରାସ୍ତାଟିର ପ୍ରଶସ୍ତୀକରଣ ଓ ସୁଦୃଢୀକରଣ କାର୍ଯ୍ୟ ଦୀର୍ଘ ୨ ବର୍ଷ ହେଲା ଚାଲିଛି । ରାସ୍ତା କାମର ଅବଧି ସରିଯାଇଥିଲେ ମଧ୍ୟ ଏବେ ସୁଦ୍ଧା ଅଧା ବି ସମ୍ପୂର୍ଣ୍ଣ ହୋଇନାହିଁ । ଅନେକ ସ୍ଥାନରେ ମାଟି ଗଦା ହୋଇ ରହିଥିବାରୁ ଯାତାୟାତରେ ସମସ୍ୟା ସୃଷ୍ଟି ହେଉଛି । ବୁଧବାର ବର୍ଷା ହେବା ଫଳରେ ମାଟି ପଡିଥିବା ସ୍ଥାନଗୁଡିକ କାଦୁଆ ହୋଇ ଖସଡା ହୋଇଥିଲା । ଅପରାହ୍ନରେ ଧବଳେଶ୍ବର ପଲିଟେକନିକର ଏକ ବସ ବିଦ୍ୟାର୍ଥୀଙ୍କୁ ନେଇ ଆସୁଥିବାବେଳେ ଉକ୍ତ କାଦୁଆ ରାସ୍ତାରେ ଦବି ଯାଇଥିଲା । ଗାଡିରୁ ତୁରନ୍ତ ଛାତ୍ରଛାତ୍ରୀ ଓହ୍ଲାଇ ପଡିବାରୁ ରକ୍ଷା ପାଇଯାଇଥିଲେ । ବସଟି ସଂକୀର୍ଣ୍ଣ ରାସ୍ତା ମଝିରେ ଫସିଯିବାରୁ ଉକ୍ତ ରାସ୍ତାରେ ଗାଡି ଚଳାଚଳ ୨ ଘଣ୍ଟା ଧରି ବନ୍ଦ ହୋଇଯାଇଥିଲା । ଖବର ପାଇ ଦମକଳ ବାହିନୀ ଆସିବା ପରେ ସ୍ଥାନୀୟ ଲୋକଙ୍କ ସହାୟତାରେ ବସଟିକୁ ସେଠାରୁ ଠେଲି ଠେଲି ବାହାର କରିବା ପରେ ରାସ୍ତାରେ ଗାଡି ଚଳାଚଳ ସ୍ଵାଭାବିକ ହୋଇଥିଲା । ଉକ୍ତ ଗୁରୁତ୍ୱପୂର୍ଣ୍ଣ ରାସ୍ତାର ନବୀକରଣ କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଶେଷ କରିବାକୁ ସାଧାରଣରେ ଦାବି ହେଉଛି ।
Comments are closed.