ବାଲେଶ୍ୱର: ଗୁଡ଼ି ଉଡ଼ାଇବା ପାଇଁ ବ୍ୟବହାର କରାଯାଉଥିବା କାଚଗୁଣ୍ଡ ମିଶା ମାଞ୍ଜା ସୂତା ବ୍ୟବହାର ପାଇଁ ରାଜ୍ୟ ସରକାର ବାରଣ କରିଥିଲେ ବି ବାଲେଶ୍ୱର ଜିଲା ପ୍ରଶାସନ ଏହାକୁ କଡ଼ାକଡ଼ି ଭାବେ ପାଳନ କରୁ ନଥିବା ଦେଖାଯାଇଛି। ସରକାରଙ୍କ ଘୋଷଣା ନାମାକୁ ଲୋକଙ୍କ ପାଖରେ ପହଞ୍ଚାଇବା ପାଇଁ ବା ସଚେତନତା ପାଇଁ କୌଣସି ପଦକ୍ଷେପ ଗ୍ରହଣ କରୁ ନାହିଁ କି କାହାରି ଉପରେ କୌଣସି ଦଣ୍ଡବିଧାନ ବା କାର୍ଯ୍ୟାନୁଷ୍ଠାନ ନିଆଯାଉ ନାହିଁ। ଫଳରେ ଘୋଷଣା କାଗଜ କଲମରେ ରହିଥିବା ବେଳେ ପ୍ରତିଦିନ ଗୁଡ଼ି ସୂତାରେ ଲୋକଙ୍କର ଜୀବନ ଯାଉ ଯାଉ ରହି ଯାଉଛି। ସେମିତି ଏକ ଘଟଣା ଦେଖିବାକୁ ମିଳିଛି ବାଲେଶ୍ବର ସହର ଉପକଣ୍ଠ ମଲ୍ଲିଶଂଶା ଖେଳପଡ଼ିଆ ନିକଟରେ।
ବାଲେଶ୍ୱରରେ ଅଘଟଣ, ଗୁଡ଼ି ମାଞ୍ଜା ସୂତାରେ ୬ ବର୍ଷୀୟ ନାବାଳକ ଅବିନାଶ ଗୁରୁତର pic.twitter.com/ex2DsLgBSX
— Samaja Live (@samajalive) January 17, 2024
ଆଜି (ବୁଧବାର) ସନ୍ଧ୍ୟାରେ ସାର ଗାଁ ଅଞ୍ଚଳର ଅବିନାଶ ମହାଲ (୬ ବର୍ଷ) ମାଞ୍ଜାଲଗା ଗୁଡ଼ିସୂତାରେ ଗୁରୁତର ଆହତ ହୋଇଛନ୍ତି। କୌଣସି କାମରେ ବାପା ଶଶୀକାନ୍ତ ଓ ମାଆଙ୍କ ସହିତ ଦୁମ୍ଦା ଯାଇଥିଲେ। ବାପା ଗାଡ଼ି ଚଲାଉଥିବା ବେଳେ ମାଆ ପଛରେ ବସିଥିଲେ ଓ ଅବିନାଶ ସାମ୍ନାରେ ବସିଥିଲେ। ଫେରିବା ବେଳେ ସଦର ଥାନା ଅନ୍ତର୍ଗତ ମଲ୍ଲିଶଂଶା ଖେଳ ପଡ଼ିଆ ନିକଟରେ କିଛି ପିଲା ଗୁଡ଼ି ଉଡ଼ାଉଥିଲେ। ହେଲେ କେହି କିଛି ବୁଝିବା ପୂର୍ବରୁ ଅବିନାଶ ଚିତ୍କାର କରିଥିଲେ ଓ ତାଙ୍କ ବେକରୁ ଧାରଧାର ରକ୍ତ ବୋହି ପଡ଼ିଥିଲା। ତାଙ୍କୁ ସଙ୍ଗେ ସଙ୍ଗେ ବାଲେଶ୍ବର ମୁଖ୍ୟ ଚିକିତ୍ସାଳୟ ନିଆ ଯାଇଥିଲା। ତେବେ ସେଠାରେ ଡାକ୍ତର ତାଙ୍କର ସ୍ବାସ୍ଥ୍ୟାବସ୍ଥା ଗୁରୁତର ଥିବା ଦେଖି ପ୍ରାଥମିକ ଚିକିତ୍ସା ପରେ କଟକ ସ୍ଥାନାନ୍ତର କରିଥିଲେ। ଏହି ଘଟଣା ନେଇ ସେହି ଅଞ୍ଚଳରେ ଉତ୍ତେଜନା ପ୍ରକାଶ ପାଇଥିଲା। ମାଞ୍ଜା ସୂତାରେ ଗୁଡ଼ି ଉଡ଼ାଉଥିବା ପିଲାମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ସ୍ଥାନୀୟ ଜନସାଧାରଣ ଦାବି କରିଛନ୍ତି।
