ଆଠଗଡ: ଆଠଗଡ ବନାଞ୍ଚଳରେ ବୁଧବାର ବାର୍ଷିକ ପକ୍ଷୀ ଗଣନା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ବନଖଣ୍ଡ ଅଧିକାରୀ ଡାକ୍ତର ଯଜ୍ଞଦତ୍ତ ପତିଙ୍କ ନିର୍ଦ୍ଦେଶକ୍ରମେ ବନାଞ୍ଚଳ ଅଧିକାରୀ ରବୀନ୍ଦ୍ର କୁମାର ନାୟକଙ୍କ ନେତୃତ୍ୱରେ ୭ଟି ଦଳ ବିଭିନ୍ନ ନଦୀ, ଦ୍ରଦ ଓ ଜଳାଶୟରେ ପକ୍ଷୀ ଗଣନା କରାଯାଇଥିବାବେଳେ ଚଳିତବର୍ଷ ୩୧ପ୍ରଜାତିର ମୋଟ ୧୮୯୪ଟି ପକ୍ଷୀ ଚିହ୍ନଟ ହୋଇଛି, ଯାହାକି ଗତ ବର୍ଷ ତୁଳନାରେ କିଛିଟା ଅଧିକ ପକ୍ଷୀ ଥିବା ପରିଲକ୍ଷିତ ହୋଇଥିଲା। ଅଂଶୁପା ମଧୁର ଜଳ ଦ୍ରଦରେ ବିଦେଶାଗତ ପକ୍ଷୀଙ୍କ ଆଗମନ ସଂପୂର୍ଣ୍ଣ ବନ୍ଦ ହୋଇଯାଇଥିବାବେଳେ ସର୍ବାଧିକ ୯୮୭ଟି ପକ୍ଷୀ ଥିବା ଗଣନାରୁ ଜଣାପଡିଛି। ଏଥିସହିତ ମୁଣ୍ଡଳି ନିକଟ ମହାନଦୀ, ଅମଙ୍ଗେଇ କୁଦ, ତିଗିରିଆରେ ମହାଦନୀ ତଟସ୍ଥିତ ଶୁଣ୍ଠିପାଳ, ରମ୍ପେଇ ପାଟ, ଜରିପାଳ ବନ୍ଧ ଓ ଜମୁନା ବନ୍ଧରେ ଏ ପକ୍ଷୀଗଣନା କରାଯାଇଥିଲା।
ଦେଶୀୟ ଓ ସ୍ଥାନୀୟ ପ୍ରଜାତିର ପକ୍ଷୀଗୁଡିକ ମଧ୍ୟରେ ପାଣିଡୁବୁକି, ଛୋଟ ପାଣିକୁଆ, ଗେଣ୍ଠାଳିଆ, କାଣ୍ଟିବଗ, ଗୋଠ ବଗୁଲି, ଛୋଟ ଓ ମଝିଆଁ ବଗ, ଚକୁଆ ଚକୋଇ, ହସଂରାଳି, ରଙ୍ଗଗେଣ୍ଡି, ମଣ୍ଡିଆ ଖାଇ, ଡାହୁକ, କୁକୁବା, ଦଳଖୁମ୍ପି, ଟିଣ୍ଟିଆ, ନଦୀ ଟିଣ୍ଟିଆ, ହଳଦିମୁହଁ ଟିଣ୍ଟିଆ, ନାଲିମୁଁହ ଟିଣ୍ଟିଆ, ପାଣିଚିରା, ମାଛରଙ୍କା, ଚିତ୍ରା ମାଛରଙ୍କା, କପୋତ, କଜଳପାତି ଓ ବଣି ଅନ୍ତର୍ଭୁକ୍ତ। ବନାଞ୍ଚଳ ଅଧିକାରୀ ଶ୍ରୀ ନାୟକଙ୍କ ନେତୃତ୍ୱରେ ବନପାଳ ସବିତା ରାଉତ, ସୁଶିଲ କୁମାର ଜେନା, ପ୍ରଶାନ୍ତ କୁମାର ପରିଡା, ବନରକ୍ଷୀ ସୋନାଲି ନାଥ, ପ୍ରଶାନ୍ତ କୁମାର ବେହେରା, ରଶ୍ମି ବାରିକ, ତନ୍ମୟ ବେହେରା ଓ ପ୍ରମିଷ୍ଠା ପ୍ରିୟଦର୍ଶିନୀ ସାମନ୍ତଙ୍କ ପରିଚାଳନାରେ ୭ଟି ଦଳ ଏହି ପକ୍ଷୀଗଣନା କାର୍ଯ୍ୟରେ ନିୟୋଜିତ ହୋଇଥିଲେ।
Comments are closed.