ଆଠଗଡ : ଆଠଗଡର ଗୋପବନ୍ଧୁ ମହିଳା ଡିଗ୍ରୀ କଲେଜରେ ବାର୍ଷିକ କ୍ରୀଡା ଉତ୍ସବ କଲେଜ ପରିସରରେ ଗୁରୁବାର ଉଦ୍ଘାଟିତ ହୋଇଯାଇଛି । କଲେଜର ଅଧ୍ୟକ୍ଷା ସଂଗୀତା ମହାପାତ୍ରଙ୍କ ସଭାପତିତ୍ୱରେ ଏହି ଉପଲକ୍ଷେ ଆୟୋଜିତ ସଭାରେ ଡେପ୍ୟୁଟି କଲେକ୍ଟର ମଧୁସ୍ମିତା ବିଶି ମୁଖ୍ୟ ଅତିଥି ଭାବେ ଯୋଗଦେଇ କ୍ରୀଡା ପତାକା ଉତ୍ତୋଳନ ପୂର୍ବକ ଏହି ତିନି ଦିନିଆ କ୍ରୀଡା ଉତ୍ସବକୁ ଉଦ୍ଘାଟନ କରିଥିଲେ । ଏଥିରେ ଉଦ୍ବୋଧନ ଦେଇ ଶ୍ରୀମତୀ ବିଶି ଛାତ୍ରାବସ୍ଥାରେ ନିୟମିତ ଖେଳକୁଦ, ଯୋଗ, ବ୍ୟାୟାମ ଓ ପ୍ରାଣାୟମ ଦ୍ୱାରା ଶାରୀରିକ, ମାନସିକ ଏବଂ ବୌଦ୍ଧିକ ବିକାଶ ହୋଇଥାଏ ବୋଲି ମତବ୍ୟକ୍ତ କରିଥିଲେ । ଆଜିକାଲି ପିଲାମାନେ ଖୋଲା ଆକାଶ ତଳେ ଖେଳକୁଦ ନକରି ମୋବାଇଲ ଫୋନରେ ଖେଳକୁ ଅଧିକ ମହତ୍ତ୍ୱ ଦେଉଛନ୍ତି, ଯାହାକି ସେମାନଙ୍କର ଶାରୀରିକ ଓ ମାନସିକ ବିକାଶରେ ପ୍ରତିବନ୍ଧକ ସାଜିଛି ବୋଲି ମତପ୍ରକାଶ କରିଥିଲେ। ମୋବାଇଲରେ ଖେଳ ଅପେକ୍ଷା ପଡିଆରେ ଖୋଲା ଆକାଶ ତଳେ ହେଉ ଅବା ଘର ଭିତରେ ଆଭ୍ୟନ୍ତର ଶାରୀରିକ ଖେଳକୁଦ କରିବା ଲାଗି ଶ୍ରୀମତୀ ବିଶି ଛାତ୍ରୀମାନଙ୍କୁ ପରାମର୍ଶ ଦେଇଥିଲେ । ମହାତ୍ମାଗାନ୍ଧୀ ଇଂରାଜୀ ମିଡିୟମ ସ୍କୁଲ କ୍ରୀଡା ଶିକ୍ଷକ ଶାନ୍ତନୁ କୁମାର ସାହୁଙ୍କ ପରିଚାଳନାରେ ଅନୁଷ୍ଠିତ ଏହି ବାର୍ଷିକ କ୍ରୀଡାର ବିଭିନ୍ନ ପ୍ରତିଯୋଗିତାରେ ଶତାଧିକ ଛାତ୍ରୀ ଅଂଶଗ୍ରହଣ କରିଛନ୍ତି। ବରିଷ୍ଠ ଅଧ୍ୟାପିକା ବବିତା ସାହୁ କାର୍ଯ୍ୟକ୍ରମ ସଂଯୋଜନା କରିଥିବାବେଳେ କଲେଜର ସମସ୍ତ ଅଧ୍ୟାପିକା ଓ କର୍ମଚାରୀ ଏଥିରେ ସହଯୋଗ କରିଥିଲେ। ଅଧ୍ୟାପିକା ସୂର୍ଯ୍ୟକାନ୍ତି ମହାପାତ୍ର ପ୍ରାରମ୍ଭିକ ସୂଚନା ଓ ଅତିଥି ପରିଚୟ ପ୍ରଦାନ କରିଥିବାବେଳେ ରଶ୍ମିତା ପଣ୍ଡା ଧନ୍ୟବାଦ ଅର୍ପଣ କରିଥିଲେ।
Comments are closed.