ଫୁଲବାଣୀ: ଦୀର୍ଘ ଦିନ ହେବ ଅନ୍ଧାରରେ ରହିବା ଏବଂ ବିଦ୍ୟୁତ ଟ୍ରାନ୍ସଫର୍ମର ପୋଡି ଯିବା ପରେ ବାରମ୍ବାର ବିଦ୍ୟୁତ ବିଭାଗୀୟ ଅଧିକାରୀଙ୍କୁ ଲିଖିତ ଅଭିଯୋଗ ପରେ କୌଣସି ସମାଧାନ ନ ହେବାରୁ ଆଜି ଦାବୀ ପୂରଣ ପାଇଁ ଗୁରୁପଡା ଗ୍ରାମର ବରସାହି ବାସୁନ୍ଦା ଗୁରୁପଡା ଛକରେ କାଠ ପକାଇ ଟାୟାର ଜାଳି ରାସ୍ତା ଅବରୋଧ କରିଥିଲେ। ସୂଚନା ଅନୁସାରେ ଫିରିଙ୍ଗିଆ ବ୍ଲକ କେଳାପଡା ପଞ୍ଚାୟତର ଗୁରୁପଡା ଗାଁର ତଳସାହି (ବରସାହି )ଗାଁରେ ଦୀର୍ଘ ଦେଢ଼ ବର୍ଷ ହେବ ବିଦ୍ୟୁତ ଟ୍ରାନ୍ସଫରମର ପୋଡି ଅଚଳ ହୋଇଯିବା ପରେ ଗାଁରେ ଥିବା ୪୨ ଟି ପରିବାର ଅନ୍ଧାରରେ ରହିଥିବା ଗ୍ରାମବାସୀ କହିଛନ୍ତି। ତେବେ ବିଦ୍ୟୁତ ଟ୍ରାନ୍ସଫରମର ପୋଡି ଥିବା ଘଟଣାରେ ଗ୍ରାମର ବିଦ୍ୟୁତ ଉପୋଭୋକ୍ତାମାନେ ବିଭାଗୀୟ ଅଧିକାରୀଙ୍କୁ ଫୁଲବାଣୀରେ ଭେଟି ଲିଖିତ ଅଭିଯୋଗ କରିଥିଲେ।
ଦୀର୍ଘ ଦେଢ଼ ବର୍ଷ ବିତିଛି କିନ୍ତୁ ବିଭାଗ ଗ୍ରାମର ବିଦ୍ୟୁତ ଉପୋଭୋକ୍ତାଙ୍କ ଅଭିଯୋଗକୁ ରଖିବା ପରେ ବିଦ୍ୟୁତ ବିଲ ପୈଠ କଲେ ପୁଣି ଟ୍ରାନ୍ସଫର୍ମର ଲାଗିବ ବୋଲି କହିବା ପରେ ଗାଁ ଲୋକେ ବିଦ୍ୟୁତ ବିଲ ପୈଠ ମଧ୍ୟ କରିଛନ୍ତି । କିନ୍ତୁ ବିଭାଗ ତରଫରୁ ମେସିନ ଲାଗି ପାରିନାହିଁ ଯାହାକୁ ନେଇ ଆଜି ଗ୍ରାମବାସୀ ମାଶ୍ରୀପଡାରୁ ସାଡୀଙ୍ଗିଆ ଯାଇଥିବା ରାସ୍ତା ଗୁରୁପଡାଛକରେ ଦୀର୍ଘ ୫ ଘଣ୍ଟା ରାସ୍ତା ଅବରୋଧ କରିଛନ୍ତି । ଖବରପାଇ ଘଟଣା ସ୍ଥଳରେ କେଳାପଡା ପଞ୍ଚାୟତ ସରପଞ୍ଚ ସ୍ବର୍ଣ୍ଣଲତା ପ୍ରଧାନ, ଫିରିଙ୍ଗିଆ ଥାନା ଅଧିକାରୀ ରମେଶ କୁମାର ପ୍ରଧାନ ଓ ଫିରିଙ୍ଗିଆ ବ୍ଲକ ଦାଇତ୍ୱରେ ଥିବା ବିଦ୍ୟୁତ ବିଭାଗର ସୁପର ଭାଇଜର ସୁଶାନ୍ତ କୁମାର ପ୍ରଧାନ ପହଞ୍ଚି ଲୋକଙ୍କ ସହ ଆଲୋଚନା କରିଥିଲେ ଏବଂ ୨ ଦିନ ଭିତରେ ବିଦ୍ୟୁତ ଟ୍ରାନ୍ସଫର୍ମର ଲଗାଇ ବିଦ୍ୟୁତ ଯୋଗାଣ କରାଯିବ ବୋଲି ପ୍ରତିଶ୍ରୁତି ପରେ ରାସ୍ତା ଅବରୋଧ ହଟିଛି ।
