ନୂଆଦିଲ୍ଲୀ: ଫ୍ଲିପ୍କାର୍ଟର ପୂର୍ବର୍ତନ ପ୍ରତିଷ୍ଠାତା ସଦସ୍ୟ ସଚ୍ଚିନ ବଂଶଲ୍ ଓ ବିନ୍ନି ବଂଶଲଙ୍କୁ ଆୟକର ବିଭାଗ ପକ୍ଷରୁ ନୋଟିସ୍ ଜାରି କରାଯାଇଛି। ଫ୍ଲିପ୍କାର୍ଟର ଅଂଶଧନ ୱାଲମାର୍ଟ ଇଣ୍ଟରନ୍ୟାସ୍ନାଲ୍କୁ ବିକ୍ରି ବାବଦରେ ସେମାନେ କେତେ ଆୟ କରିଛନ୍ତି ଓ କେତେ ଲାଭ ପାଇଛନ୍ତି ସେ ସମ୍ପର୍କରେ ସବିଶେଷ ସୂଚନା ଦେବାକୁ ଆଇଟି ନୋଟିସ୍ରେ ଉଲ୍ଲେଖ ରହିଛି। ଦୁଇ ପ୍ରତିଷ୍ଠାତା ସଦସ୍ୟଙ୍କ ସମେତ ଫ୍ଲିପ୍କାର୍ଟର ୩୫ ଜଣ ଅଂଶୀଦାର ଓ ୱାଲମାର୍ଟକୁ ମଧ୍ୟ ନୋଟିସ ଜାରି କରାଯାଇଥିବା ଜଣାପଡ଼ିଛି।
ଗତ ମେ’ ୯ ତାରିଖରେ ଫ୍ଲିପ୍କାର୍ଟର ୭୭% ଅଂଶଧନକୁ ୱାଲମାର୍ଟ ୧୬ ବିଲିୟନ ଡଲାରରେ କିଣିଥିଲା। ଗତ ଅକ୍ଟୋବର ୮ ତାରିଖରେ ଏହି ନୋଟିସ ଜାରି କରାଯାଇଥିବା ବେଳେ ଏ ପର୍ଯ୍ୟନ୍ତ ସଚ୍ଚିନ୍ ଓ ବିନ୍ନିଙ୍କ ପକ୍ଷରୁ ଏହାର ଜବାବ ଦାଖଲ କରାଯାଇ ନ ଥିବା ଜଣାପଡ଼ିଛି। ଇତିମଧ୍ୟରେ ୱାଲମାର୍ଟ ୭,୪୩୯ କୋଟି ଟଙ୍କାର ଟିକସ ଦାଖଲ କରିଛି।
